“Azərsu”da 6 ayın yekunları ilə bağlı iclas keçirilib

"Azərsu" Açıq Səhmdar Cəmiyyətinin 2018-ci ilin yanvar-iyun ayları üzrə fəaliyyətinin yekunlarına və qarşıda duran vəzifələrə həsr olunmuş iclası keçirilib. Səhmdar Cəmiyyətin ictimaiyyətlə əlaqələr şöbəsindən "OLAYLAR"-a daxil olan məlumata görə, iclası giriş sözü ilə açan "Azərsu" ASC-nin sədri Qorxmaz Hüseynov bildirib ki, 2018-ci ilin 6 ayında istehlakçılara göstərilən içməli su təchizatı və kanalizasiya xidmətlərinin yaxşılaşdırılması istiqamətində mühüm layihələr həyata  keçirilib: "Fevral ayında Mingəçevir, may ayında isə Xaçmaz və Xızı şəhərlərində, eləcə də Altıağac qəsəbəsində içməli su layihələrinin icrası yekunlaşıb və  Prezident İlham Əliyevin iştirakı ilə açılış mərasimləri keçirilib. Ümumilikdə su təchizatı və kanalizasiya sistemlərinin yenidən qurulmasına başlanmış 50 şəhər və rayon mərkəzinin 25-də su və kanalizasiya şəbəkələrinin, 10-da isə su şəbəkələrinin inşası yekunlaşıb.  İlin ötən dövründə cənab Perzident Mingəçevir, Tovuz, Ağstafa, Şirvan, Lerik və Ağdaş şəhərlərinin su təchizatının yaxşılaşdırılması və kanalizasiya sistemlərinin yenidən qurulması, eləcə də respublikanın 13 rayonunun ümumilikdə 45 min nəfər əhalisi olan 30 yaşayış məntəqəsinin içməli su təchizatının yaxşılaşdırılması ilə bağlı əlavə tədbirlər haqqında sərəncamlar imzalayıb".

Qeyd olunub ki, Prezident İlham Əliyevin "Əhalinin içməli su ilə təminatının yaxşılaşdırılmasına dair əlavə tədbirlər haqqında" 09 aprel 2018-ci il tarixli Sərəncamına, həmçinin dövlət investisiya layihəsinə əsasən içməli su çatışmazlığının  müşahidə edildiyi Oğuz rayonunun Astarxanovka, Vladimirovka, Qarabulaq, Ağstafa rayonunun Yeni Gün, Masallı rayonunun Məmmədxanlı, Göyçay rayonunun İkinci Ərəbcəbirli, Qusar rayonunun Aşağı Ləgər və Xızı rayonunun Yeni Yaşma kəndlərində içməli su təchizatı layihələrinin icrası yekunlaşıb. Həmin layihələr hesabına ümumilikdə 10 minə yaxın sakin  keyfiyyətli içməli suya çıxış imkanı qazanıb. Bundan əlavə, dövlət başçısının "İstehlakçıların suölçən cihazlarla təmin edilməsi haqqında" sərəncamına uyğun olaraq işlər davam etdirilib.

"Azərsu" ASC-nin sədri daha sonra qeyd edib ki, 2018-ci ilin yanvar-iyun aylarında ölkə üzrə 510 km içməli su və 201 km kanalizasiya xətləri çəkilib. Görülmüş işlər nəticəsində 7800 nəfər ilk dəfə mərkəzləşdirilmiş qaydada içməli su ilə təmin edilib, 30 min 400 nəfərin su təminatı fasiləsiz rejimə keçirilib. Bununla da, fasiləsiz rejimdə su təminatının səviyyəsi ölkə üzrə 67,6 faiz təşkil edib. Ölkə üzrə abonentlərin sayğaclaşma səviyyəsi 79,4 faizə çatdırılıb.

"Azərsu" ASC-nin sədri Qorxmaz Hüseynov iclasa yekun vuraraq görüləcək işlər və qarşıda duran vəzifələr barədə tapşırıqlarını verib. Qeyd olunub ki, bu il Ağdaş, Qəbələ, Daşkəsən və Ağcabədi şəhərlərində su və kanalizasiya şəbəkələrinin, Astara şəhərində isə su şəbəkəsinin inşası başa çatdırılacaq, eyni zamanda, sutkalıq məhsuldarlığı 140 min kubmetr olan Şəmkirçay sutəmizləyici qurğusu istismara veriləcək. Bununla yanaşı, Prezident sərəncamlarına uyğun olaraq Şamaxı, Gədəbəy,  Lerik və Tovuz şəhərləri üçün alternativ su mənbələrinin yaradılması layihələrinin icrası tamamlanacaq.