Daha bir boksçumuz Olimpiadadan kənarda qaldı

Vətən Hüseynli rəqibini nokdauna salsa da, bu, xal sayında geri qalan boksçumuza kifayət etməyib

Londonda keçirilən XXX yay Olimpiya oyunlarında millimizin daha bir üzvü ümidləri doğrultmayıb. Mübarizəyə 1/16 final mərhələsindən başlayan boksçumuz Vətən Hüseynli (81 kiloqram) ekvadorlu Karlos Qonqoru Merkado ilə qarşılaşıb.İlk raundda qapalı döyüşə üstünlük verən təmsilçimiz yekunda rəqibinə uduzub - 2:4. İkinci hissə də Merkadonun üstünlüyü şəraitində keçib. Dəqiq zərbələr vuran Ekvador təmsilçisi bu dəfə fərqi 3 xala çatdırıb - 7:4.Üçüncü raundda isə Vətən öz döyüşünü tapıb. O, rəqibini nokdauna salsa da, bu yalnız xal fərqinin azalması ilə nəticələnib. Yekunda Karlos 9:8 hesabı ilə alib gəlib və Hüseynli Olimpiada ilə vaxtından əvvəl vidalaşıb.