Dünyanın ən dərin quyusunda QORXUNC SİRR - Niyə araşdırma dayandırıldı?

Rusiyanın Murmansk vilayətində yerləşən və dünyanın ən dərin süni quyusu hesab edilən "Kola Superdərin Quyusu" ilə bağlı illərdir dolaşan suallar davam edir.Milli.Az xəbər verir ki, 1970-ci ildə start verilən layihə çərçivəsində alimlər 12,262 metr dərinliyə qədər enməyi bacarıb. 

Lakin araşdırmaların dayandırılmasının arxasında qorxulu iddialar yox, real səbəblər dayanır.

Belə ki, qazıntılar zamanı temperatur gözləniləndən xeyli yüksək - təxminən 180 dərəcəyə çatıb. Bu isə istifadə olunan texnikanın işləməsini çətinləşdirib, hətta bəzi hallarda avadanlıqlar yararsız hala düşüb.

Digər tərəfdən, dərinlik artdıqca yer qatlarının stabilliyi pozulub, quyu tez-tez çökmə riski ilə üzləşib. Bu da qazma prosesini daha da mürəkkəbləşdirib.

Layihənin dayandırılmasına təsir edən əsas amillərdən biri də maliyyə problemi olub. 1990-cı illərdə SSRİ-nin dağılmasından sonra layihəyə ayrılan vəsait kəskin şəkildə azalıb.

Mütəxəssislər bildirir ki, əldə edilən nəticələr Yer qabığının quruluşu ilə bağlı əvvəlki nəzəriyyələri dəyişdirib. Layihə 1992-ci ildə dayandırılsa da, 2005-ci ildə rəsmi olaraq bağlanaraq möhürlənib.

Bu gün də "dünyanın ən dərin dəliyi" kimi tanınan bu obyekt öz sirrini qorumaqda davam edir və elmi marağın mərkəzində qalır.

Bununla belə, illərdir internetdə "cəhənnəmdən gələn səslər" və digər qorxulu iddialar yayılır. Lakin alimlər bu kimi məlumatların heç bir elmi əsası olmadığını və daha çox mif və sensasiya xarakteri daşıdığını vurğulayır.