Ukrayna düşmən raketlərini kosmosdan zərərsizləşdirməyi planlaşdırır

Ukrayna kosmosdan öz kəşfiyyat məlumatlarını əldə edə biləcək və düşmənin orbital raket sistemlərini vurmaq imkanına malik olacaq yeni növ Silahlı Qüvvələrin yaradılmasına hazırlaşır. Müharibə dövründə artıq Baş Kəşfiyyat İdarəsi (Müdafiə Nazirliyinin Baş Kəşfiyyat İdarəsi - BKİ) unikal əməliyyatlar həyata keçirərək iki dəfə raketdaşıyıcıları kosmik məkana çıxarıb.

Olaylar.az xəbər verir ki, bu barədə "RBK-Ukrayna"ya müsahibəsində Ali Radanın Milli Təhlükəsizlik, Müdafiə və Kəşfiyyat Komitəsinin dövlət təhlükəsizliyi, müdafiə və müdafiə innovasiyaları üzrə alt komitəsinin rəhbəri Fyodor Venislavski danışıb.

Onun sözlərinə görə, Ukrayna artıq gizli buraxılışlar həyata keçirib. BKİ bölmələri genişmiqyaslı müharibə zamanı iki dəfə raketdaşıyıcıları uğurla kosmosa çıxarıb: birinci dəfə 100 kilometrdən artıq hündürlüyə, ikinci dəfə isə 204 kilometr hündürlüyə.

Beləliklə, Ukrayna Silahlı Qüvvələri Rusiyanın "Oreşnik" buraxılışlarına cavab hazırlayır. Ukrayna "Oreşnik" tipli qismən orbital raket sistemlərinin döyüş başlıqları kosmosda ayrılmadan əvvəl onları zərərsizləşdirmək üçün öz kinetik tutma vasitələrini yerləşdirməyi planlaşdırır.

Ukraynanın hava kosmodromu mövcuddur. Artıq 8 min metr hündürlükdə nəqliyyat təyyarəsindən raketdaşıyıcının buraxılması texnologiyası sınaqdan keçirilib ki, bu da öz kosmik layihələrin və Kosmik Qüvvələrin xüsusi əməliyyatlarının həyata keçirilməsi üçün faydalı yükün Yerə yaxın orbitə çıxarılmasının effektivliyini əhəmiyyətli dərəcədə artırır.

Öz peyk sistemi və müstəqil rabitə sistemi olacaq Kosmik qüvvələrin tamdəyərli tətbiqinin 3-5 il çəkəcəyi gözlənilir.