Niyə görünmür?-İran XİN-dən Müctəba Xameneyi ilə bağlı ilk rəsmi etiraf

İran Xarici İşlər Nazirliyi ölkənin yeni Ali Rəhbəri seçilən Müctəba Xameneyinin 2026-cı il fevralın 28-dən bəri ictimaiyyət qarşısına çıxmamasını ilk dəfə rəsmi şəkildə şərh edib.

Musavat.com xəbər verir ki, nazir müavini Səid Xatibzadə verdiyi açıqlamada Ali Rəhbərin gizlənməsinin birbaşa "təhlükəsizlik mülahizələri" və ona qarşı real sui-qəsd təhlükəsi ilə bağlı olduğunu bildirib.

Xatibzadə vurğulayıb ki, ABŞ-ın beynəlxalq hüququ tapdalayaraq İranın əvvəlki dövlət başçısını (Ayətullah Əli Xameneyini) aradan götürməsindən sonra Müctəba Xameneyinin həyatı üçün risklər "ekstremal dərəcədə yüksək"dir.

Tehran hesab edir ki, Vaşinqtonun dəstəyi ilə İsrail kəşfiyyatı istənilən an yüksək rütbəli hədəflərə qarşı "terror aktı" törətməyə hazırdır. Bu səbəbdən Ali Rəhbər tamamilə təhlükəsiz və gizli məkanda fəaliyyət göstərir.

Qərb mediası (xüsusilə "Times of Israel" və "The Times") 56 yaşlı Xameneyinin fevralın 28-də anasının, həyat yoldaşının və övladının həlak olduğu həmin zərbə zamanı ağır yaralandığını və Qum şəhərində "hərəkətsiz" vəziyyətdə müalicə aldığını iddia etsə də, XİN bu xəbərləri təkzib edir. Rəsmi Tehran onun vəziyyətinin stabil olduğunu və ölkəni idarə etdiyini bildirir.

Xameneyinin bu günə qədər olan bütün müraciətləri dövlət televiziyasında yalnız yazılı şəkildə oxunub. O, son bəyanatında Hörmüz boğazı üzərində nəzarətin "yeni mərhələyə" keçdiyini və atasının qisası alınana qədər "barmağının tətikdə" olacağını bildirib.

Ekspertlər hesab edirlər ki, Xameneyinin görüntülü çıxış etməməsi İran daxilində real hakimiyyətin kimin əlində olması (SEPAH, yoxsa klerikallar) barədə sualları artırır. Aprelin 10-da İslamabadda başlayacaq danışıqlar ərəfəsində bu açıqlama, Tehranın öz liderini qorumaq üçün hər cür qapalı rejimə keçdiyini nümayiş etdirir.