Ermənilər Sərkisyandan bu xəbəri gözləyir: Paşinyana qarşı 30 nəfərlik plan

Ermənistanın sabiq prezidenti Serj Sərkisyanın rəhbərlik etdiyi Respublika Partiyası (HHK) iyunun 7-nə təyin olunan parlament seçkilərində iştirak edib-etməyəcəyi ilə bağlı qərarını açıqlamağa tələsməsə də, partiyanın qurultayı aprelin əvvəlinə təyin olunub.

Globalinfo.az xəbər verir ki, bu barədə "Hrabarak" qəzeti məlumat yayıb.

Nəşr yazır ki, partiya rəhbərliyi bölgələrdəki strukturlara səfərlər edir, lakin naməlum səbəblərdən bu səfərlər ictimaiyyətə açıqlanmır:

"Məlumata görə, partiya həmçinin yeni, uzunmüddətli strategiya üzərində işləyir. Həmin strategiya qurultaya qədər tamamlanmalı və nümayəndələrə təqdim edilməlidir. Bundan başqa, daxili struktur dəyişiklikləri də həyata keçirilir. Bir sözlə, partiya hazırda aktiv təşkilati fəaliyyət mərhələsindədir.

Gözlənilir ki, qurultaya qədər, təxminən martın ortalarında seçkilərdə iştirak edib-etməmək barədə qərar açıqlanacaq. Əgər iştirak qərarı verilsə, qurultay zamanı qanunun tələbinə uyğun olaraq seçki siyahısının ilk 30 namizədi təsdiqlənəcək.

Mənbələrin bildirdiyinə görə, hazırda məsələ ilə bağlı soruşanlara "qərar hələ yekun deyil, iştirak edib-etməmək ehtimalı 50/50-dir" cavabı verilir. Lakin bəzi şəxslər əmindirlər ki, bu dəfə HHK seçkilərə qatılmayacaq və əsas məqsəd digər müxalif siyasi qüvvələrə dəstək verərək baş nazir Nikol Paşinyanın rəhbərlik etdiyi hakim Mülki Müqavilə Partiyasını məğlub etmək olacaq".