Ermənistanda turizm bumu: Çinli turistlərin sayı kəskin artıb, sektor rəqəmsallaşır – ÖZƏL

Olaylar.az xəbər verir ki, Ermənistan Turizm Komitəsinin sədri Lusine Gevorkyan fevralın 23-də keçirdiyi mətbuat konfransında ölkənin turizm sektorundakı son göstəriciləri və strateji planları açıqlayıb.

Gevorkyanın sözlərinə görə, Rusiya bazarında müəyyən azalma müşahidə olunsa da, bazarın diversifikasiyası nəticəsində ümumi turist axını 2,7% artıb: Çindən gələn turistlərin sayı 2024-cü ildəki 33 mindən 2025-ci ildə 45 minə yüksəlib. Gürcüstanla birgə turların təşkili planlaşdırılır. 2026-cı ilin yanvarında ölkəyə 170 mindən çox turist gəlib ki, bu da ötən ilin eyni dövrü ilə müqayisədə 40 min nəfər çoxdur.
Körfəz ölkələri ilə viza rejiminin liberallaşdırılması, Rumıniyadan ucuz uçuşların başlaması və ABŞ-dən gələnlərin 15% artması sektora müsbət təsir edib. 2025-ci ildə turistlərin 41%-i Rusiyanın, 300 min nəfəri isə Gürcüstanın payına düşüb.

Hökumət tərəfindən təsdiqlənmiş yeni strateji proqram çərçivəsində bir neçə mühüm yenilik gözlənilir: 7 xüsusi turizm zonasında infrastruktur və yollar yenidən qurulacaq. 1 iyuldan etibarən mehmanxanalar, bələdçilər və tur operatorları üçün elektron sertifikatlaşdırma sistemi işə düşəcək. ABŞ şirkəti ilə birgə "Med.am" rəqəmsal platforması istifadəyə veriləcək və BMT ilə birgə beynəlxalq konfrans keçiriləcək. Məkanlarda mədəni-tarixi, qastro, macəra, MICE (işgüzar) və ekoturizmin inkişafına üstünlük veriləcək.

Gevorkyan həmçinin beynəlxalq mediada Ermənistanın təbliği üçün 79 jurnalist və bloqerin ölkəyə dəvət edildiyini, Rusiyanın "MITT" sərgisində fəal iştirak edəcəklərini vurğulayıb.