Berlin Avropanın nüvə qalxanı ideyasını yenidən gündəmə gətirir- ÖZƏL 

ABŞ prezidenti Donald Trampın Qrenlandiyanı ABŞ-a birləşdirmək istəyi ilə bağlı açıqlamaları Almaniyada Vaşinqtondan asılı olmayan Avropa nüvə qalxanının yaradılması mövzusunda müzakirələri yenidən alovlandırıb. Olaylar.az xəbər verir ki, bu barədə Handelsblatt qəzeti yazır. Qəzetin məlumatına görə, Ukraynadakı müharibə və Trampın Rusiyaya qarşı "mülayim mövqeyi" Avropada narahatlığı daha da artırıb. Bir çox siyasətçi mümkün genişmiqyaslı münaqişə zamanı ABŞ-ın nüvə çətirinə tam güvənməyin çətin ola biləcəyini düşünür. Bu fonda Almaniyanın hakim koalisiyasını təşkil edən xristian demokratlar və sosial-demokratlar Avropanın nüvə təhlükəsizliyi məsələsində nə dərəcədə müstəqil olmalı olduğu barədə fikir ayrılığı yaşayırlar.
Bundestaqın Sosial-Demokrat Partiyasından olan deputatı Ralf Şteqner Handelsblatt-a bildirib ki, ABŞ-ın "xaotik siyasəti" və silahlara nəzarət sazişlərinin qüvvədən düşməsi nüvə silahlarının artırılmasına bəhanə olmamalıdır. Onun fikrincə, Almaniyanın Avropa nüvə qalxanı layihəsində dolayı yolla belə iştirakı - istər silahların ölkə ərazisində yerləşdirilməsi, istərsə də maliyyələşdirmə - Nüvə Silahlarının Yayılmaması Müqaviləsinə və Almaniyanın birləşməsinə imkan verən "İki üstəgəl dörd" sazişinə ziddir.
Xristian-Sosial İttifaqdan olan deputat Aleksandr Hoffmann isə hesab edir ki, Almaniya və Avropa bütün sahələrdə çəkindirmə və müdafiə qabiliyyətinə malik olmalıdır. Onun sözlərinə görə, bu müzakirələrdə "qadağan olunmuş mövzular olmamalıdır".
Kiel Universitetinin Təhlükəsizlik Siyasəti İnstitutunun keçmiş direktoru Yohannes Krauze də Avropanın öz nüvə qalxanı barədə düşünməsinin vacibliyini qəbul etsə də, tam müstəqil Avropa nüvə qüvvələrinin yaradılmasını real saymır. O, alternativ olaraq Böyük Britaniya və Fransanın Avropada nüvə çəkindirmə məsuliyyətinin bir hissəsini ABŞ-dan üzərinə götürməsini, arsenallarını həm kəmiyyət, həm də keyfiyyət baxımından genişləndirməsini təklif edir. Krauzeyə görə, Almaniya bu prosesləri maliyyələşdirə və bunun müqabilində nüvə qərarlarının qəbulunda söz haqqı əldə edə bilər.