Pentaqon iş axınlarını optimallaşdırmaq üçün Gemini və Grok süni intellekt çatbotlarını tətbiq edəcək- ÖZƏL

ABŞ Müdafiə Nazirliyi (Pentaqon) iş proseslərinin optimallaşdırılması məqsədilə Google-un Gemini və xAI şirkətinin Grok süni intellekt çatbotlarını öz sistemlərinə inteqrasiya etməyi planlaşdırır. Olaylar.az xəbər verir ki, bu barədə qurumun yaydığı rəsmi press-relizdə bildirilir.
Sənəddə qeyd olunur ki, Müdafiə Nazirliyinin bütün strukturları Gemini və Grok kimi qabaqcıl generativ süni intellekt modellərinə çıxış əldə edəcək. Eyni zamanda, bu texnologiyaların sürətli və təhlükəsiz şəkildə hazırlanması və tətbiqi üçün xüsusi rəhbər prinsiplər hazırlanacaq. Məqsəd korporativ iş axınlarını köklü şəkildə yeniləmək və daha səmərəli etməkdir.
Pentaqon süni intellektdən yalnız inzibati və analitik işlərdə deyil, həm də hərbi əməliyyatların idarə olunması, döyüş ssenarilərinin modelləşdirilməsi və yeni silah növlərinin hazırlanmasında istifadə etməyi nəzərdə tutur.
Qurum həmçinin süni intellekt sahəsində ən yaxşı mütəxəssisləri cəlb etməyi planlaşdırır. Açıqlamada vurğulanır ki, ABŞ hərbi strukturlarında süni intellektin əsas texnologiyaya çevrilməsi ölkənin bütün əməliyyat sahələrində üstünlüyünü daha da gücləndirməlidir.

Zeynəb Mustafazadə