Cənubi Koreya lideri: Çin Şimali Koreyanın nüvə proqramında vasitəçi ola bilər – ÖZƏL

Cənubi Koreya Prezidenti Li Çje Men Çinin lideri Si Cinpini Pxenyanın nüvə proqramını "cilovlamağa" kömək etməyə çağırdığını bildirib. 

Olaylar.az xəbər verir ki, AFP-in verdiyi məlumata görə, Li müəyyən şərtlər daxilində kütləvi qırğın silahlarının hazırlanmasının dondurulmasının mümkün olduğunu da istisna etməyib.

Li Çje Menin bu həftə Çinə səfəri son altı ildə Cənubi Koreya liderinin bu ölkəyə ilk rəsmi səfəridir. Seul ən böyük ticarət tərəfdaşı olan Çinlə münasibətləri geniş şəkildə yenidən qurmağa çalışır.

Cənubi Koreya prezidenti bazar ertəsi Pekində Si Cinpinlə görüşüb. Görüş Şimali Koreyanın Yapon dənizi istiqamətində iki ballistik raket buraxmasından bir gün sonra baş tutub. Li bildirib ki, Çinin Koreya yarımadası, o cümlədən Şimali Koreyanın nüvə proqramı məsələsində vasitəçi rolunu oynamasını istəyib.

"Bütün kanallarımız faktiki olaraq bağlanıb. Ümid edirik ki, Çin sülhə nail olmaq üçün vasitəçi kimi çıxış edə bilər", - deyə Li vurğulayıb.

Onun sözlərinə görə, Si Cinpin Seulu Pxenyana münasibətdə səbirli olmağa çağırıb və iki Koreya arasındakı əlaqələrin xeyli zəiflədiyini qeyd edib. Li də etiraf edib ki, son dövrlərdə keçirilən hərbi fəaliyyətlər Şimali Koreya tərəfindən təhdid kimi qəbul edilə bilər.

Cənubi Koreya lideri Pxenyanın nüvə proqramını "kompensasiya" qarşılığında dondurmasını nəzərdə tutan plan da təklif edib. O bildirib ki, əlavə nüvə silahı istehsal edilməməsi, nüvə materiallarının xaricə ötürülməməsi və qitələrarası ballistik raketlərin inkişafının dayandırılması belə müsbət nəticə ola bilər. Uzunmüddətli hədəfin isə Koreya yarımadasının nüvəsizləşdirilməsi olduğunu vurğulayıb.

Şimali Koreya isə nüvə proqramının "geri dönməz" olduğunu dəfələrlə bəyan edib. İki Koreya arasındakı münasibətlər son illərin ən aşağı səviyyəsinə enib. Bazar ertəsi Pxenyan nüvə qüvvələrinin müharibəyə hazır olduğunu açıqlayıb və son "geosiyasi böhranı" diqqətlə izlədiyini bildirib ki, bu da ABŞ-nin Venesuelaya son hücumuna eyham kimi qiymətləndirilir.