“Tramp Ukraynanın gecikməsinin Kiyevin danışıqlardakı mövqeyini zəiflətdiyini anlayır” – ÖZƏL

ABŞ prezidenti Donald Tramp, görünür, Ukraynanın münaqişənin həllini gecikdirməsinin Kiyevin danışıqlardakı mövqeyini zəiflətdiyini başa düşür.  Olaylar.az xəbər verir ki, bu fikri Vaşinqtondakı Amerika Universitetinin Nüvə Tədqiqatları İnstitutunun direktoru, professor Piter Kuznik TASS-a Trampın 28 dekabrda Ukrayna lideri Volodimir Zelenski ilə görüşünə dair şərhində bildirib. Kuznikin sözlərinə görə, görüşün nəticələrinə dair hər hansı irəliləyiş baş veribsə belə, bu, "çox cüzi" olub:
"Bu, təəssüf doğurur, lakin tamamilə gözlənilən idi. Heç kim əhəmiyyətli irəliləyişdən danışmadı. Hər iki tərəf mövcud problemlərin mürəkkəbliyini və onların həllinin nə qədər çətin olduğunu vurğuladı". Ekspert  diqqəti ona da yönəldib ki, bu dəfə Tramp "adi entuziazm və optimizmini nümayiş etdirməyib":
"Adətən o, istənilən danışıqların nəticələrini mümkün qədər uğurlu göstərir və əldə olunan irəliləyişləri öz üstünə yazırdı. Bu dəfə isə belə bir ton müşahidə olunmadı".
Kuznik bildirib ki, tərəflər fikir ayrılığı olan məsələlər üzrə razılığa gəlmədən görüşü başa vurublar:
"Tramp sanki anlayır ki, Ukrayna nə qədər uzun müddət müqavimət göstərsə, bir o qədər danışıqlardakı mövqeyi zəifləyəcək və daha çox ukraynalı həyatını itirəcək və ya yaralanacaq".
Onun fikrincə, Zelenski və Avropadakı müttəfiqləri bu vəziyyəti təhlükəli siqnal kimi qəbul edir və artıq Trampa əvvəlki ABŞ prezidenti Co Baydenə olduğu kimi arxalana bilməyəcəklərini dərk edirlər.