İsrail: İran təlimlər adı altında hücum hazırlaya bilər – ÖZƏL

Olaylar.az xəbər verir ki, Axios-un məlumatına görə, İsrail İranın hərbi təlimlər pərdəsi altında qəfil hücum ehtimalı barədə ABŞ administrasiyasını xəbərdar edib və müdafiə sahəsində sıx koordinasiyaya çağırıb.

Məlumata əsasən, hazırda kəşfiyyat məlumatları İran daxilində qüvvələrin yerdəyişməsini göstərsə də, 7 oktyabr 2023-cü il HƏMAS hücumundan sonra İsrail ordusu risklərə yanaşmada daha sərt mövqe tutur. Mənbələrdən biri bildirib ki, İranın hücum ehtimalı 50 faizdən aşağı qiymətləndirilsə də, heç kim bunu sadəcə təlim kimi qəbul edib riskə getmək istəmir. ABŞ kəşfiyyatı isə hələlik qaçılmaz hücum əlamətləri görmür.

İsrail Baş Qərargah rəisi, general-leytenant Eyal Zamir ABŞ Mərkəzi Komandanlığının rəhbəri admiral Bred Kuperlə əlaqə saxlayaraq SEPAH-ın raket təlimləri və bunun qəfil zərbə üçün örtük ola biləcəyi barədə xəbərdarlıq edib. Zamir müdafiə tədbirlərinin sıx koordinasiyasının vacibliyini vurğulayıb. Bu çərçivədə Tel-Əvivdə keçirilən görüşdə Kuper də iştirak edib.

Axios mənbələri ən böyük təhlükənin səhv hesablamalar olduğunu qeyd edir: tərəflərdən hər biri qarşı tərəfin hücuma hazırlaşdığını düşünərək qabaqlayıcı addım ata bilər.

İsrail kəşfiyyatı İranın ballistik potensialını yenidən artırdığını bildirir. İyunda baş vermiş 12 günlük müharibədən sonra İranın raket arsenalı 3000-dən 1500-ə, buraxılış qurğuları isə 400-dən 200-ə enib. Hazırda bu potensialın bərpası istiqamətində addımlar atılsa da, müharibədən əvvəlki səviyyəyə hələ çatmayıb.

İsrail kəşfiyyatı və "Mossad" yaxın iki-üç ayda hərbi tədbirlərə ehtiyac görmür, lakin sonrakı dövrdə məsələnin aktuallaşa biləcəyini istisna etmir. İsrailin baş naziri isə vəziyyəti 2025-ci ilin dekabr ayının sonunda ABŞ prezidenti ilə müzakirə etməyi planlaşdırır.