Pekin onlayn platformaları sıxışdırır-blogerlər üçün yeni qaydalar gəlir

Çin hökuməti ölkədə blogerlər və internet platformaları üzərində nəzarəti daha da sərtləşdirməyə hazırlaşır. 

Olaylar.az xəbər verir ki, bu barədə məlumatı Çin Mərkəzi Televiziyası (CCTV) yayıb.

CCTV-nin açıqlamasına görə, Çin Xalq Respublikasının Sədri Si Cinpin internet idarəçiliyinin uzunmüddətli və davamlı mexanizminin yaradılması barədə göstəriş verib. 

Onun tapşırığına əsasən, onlayn platformalar və böyük auditoriyaya malik blogerlər daha ciddi qaydalara tabe olacaq, sosial məsuliyyət daşıyacaq və dövlətin tələb etdiyi "pozitiv kontent" yaymağa məcbur ediləcək.

Yeni çərçivə blogerlərin fəaliyyətinə, yayımladıqları videolara, canlı yayımlara, sosial şəbəkə paylaşımlarına və platformaların alqoritmik tövsiyə sistemlərinə qədər geniş sferanı əhatə edəcək. Pekin bununla internetdə "informasiya xaosunu", "zərərli təsirləri" və dövlətin müəyyən etdiyi "mənfi trendləri" aradan qaldırmağı hədəfləyir.

Tənqidçilər bildirirlər ki, bu addım Çin hakimiyyətinin onlayn fəaliyyətə nəzarəti daha da gücləndirməsi, senzuranın dərinləşməsi və azad məzmun istehsalının məhdudlaşdırılması deməkdir.

Rəsmi qurumlar isə iddia edir ki, tədbirlərin məqsədi "cəmiyyətin sağlam informasiya mühitini qorumaq", gəncləri mənfi təsirlərdən uzaq saxlamaq və internetdə "məsuliyyətsiz davranışların" qarşısını almaqdır.