Tbilisidə müxalifət lideri məhkəmə binasını yandırmağa cəhddə ittiham olunaraq saxlanılıb – ÖZƏL

Gürcüstanda müxalif partiya "Lelo - Güclü Gürcüstan"ın nümayəndəsi Aleko Elisaşvili Tbilisidə məhkəmə binasını yandırmağa cəhd etməkdə ittiham olunaraq saxlanılıb. 

Olaylar.az xəbər verir ki, bu barədə "Sputnik Gürcüstan" məlumat yayıb.

Məlumata görə, Elisaşvili məhkəmənin kargüzarlıq otağının şüşəsini sındırıb, içəridəki texnika və sənədlərin üzərinə benzin tökərək yanğın törətməyə çalışıb. Saxlanılma zamanı o, polisə müqavimət göstərib və nəticədə bir icra məmuru xəsarət alıb. Axtarış zamanı siyasətçinin üzərindən tapança da tapılıb.

Bildirilib ki, bundan əvvəl Elisaşvili barəsində bir şəxsi döymək ittihamı ilə cinayət işi açılmışdı. 2024-cü ilin yayında isə o, Gürcüstan parlamentinin deputatı olduğu dövrdə hakim "Gürcü Arzusu" partiyasının fraksiya rəhbəri Mamuka Mdinaradzenin üzərinə yumruqla hücum etmişdi. Həmin vaxt deputat toxunulmazlığı səbəbindən onun barəsində cinayət təqibinə başlanmamışdı.