Eçmiədzində keçirilən liturgiyada: “Erməni kilsəsi daxildən yaralanıb, xaricdən təzyiq altındadır” – ÖZƏL

Olaylar.az xəbər verir ki, Birinci Taxt Eçmiədzində keçirilən liturgiya zamanı yepiskop Daniel Findikyan Ermənistan Apostol Kilsəsinin (EAK) hazırkı vəziyyətini şərh edərək bildirib ki, kilsə həm daxildən zədələnib, həm də xarici təzyiqlərlə üz-üzədir. O, Ermənistan hakimiyyətinin kilsəyə qarşı son tənqidləri fonunda mövcud vəziyyəti "ağrı və xaos" kimi qiymətləndirib.

"Bu gün biz dərin ağrı və xaos şəraitində toplaşmışıq. Kilsə daxildən yaralanıb, xaricdən təzyiq altındadır, cəmiyyətdə inamsızlıq artır. Dövlət ittiham edir, Kilsə müdafiə olunur. Erməni xalqı şübhə və dedi-qodular içərisində qalıb", - deyə Findikyan bildirib.

O vurğulayıb ki, kilsə daxili ziddiyyətlərlə parçalanmamalıdır və siyasi gündəmin İncilin təlimindən üstün tutulması yolverilməzdir. Apostol Pavelin "kilsə - Məsihin bədənidir və bir üzv əzab çəkəndə hamı əzab çəkir" sözlərini xatırladan Findikyan qeyd edib ki, erməni xalqı məhz bu düşüncə ilə əsrlər boyu təqiblərdən və sınaqlardan keçib, heç bir imperiya onun inamını sındıra bilməyib.

Yepiskop kilsənin dirçəlməsinə çağıraraq bildirib ki, EAK-ı "muzey və ya keçmiş şöhrətin abidəsinə" çevirmək olmaz. Onun sözlərinə görə, kilsə sevgiyə və ilhama əsaslanan islahat və yenilənməyə ehtiyac duyur.