ABŞ senatorları: Gürcüstan hökuməti dərhal siyasi azadlıqları bərpa etməlidir – ÖZƏL

Olaylar.az xəbər verir ki, ABŞ Senatının Xarici Əlaqələr Komitəsinin sədri, respublikaçı Cim Riş və komitədə demokratların lideri Cin Şeyxin Gürcüstanda fasiləsiz etirazların başlanmasının ildönümü ilə bağlı birgə bəyanat yayıblar. Sənəddə senatorlar Gürcüstan hökumətini "dərhal kursu dəyişməyə, siyasi azadlıqları bərpa etməyə və demokratik idarəetməyə qayıtmağa" çağırıblar.

Bəyanatda bildirilir ki, "bir il əvvəl Gürcüstan tarixinin yeni və qaranlıq mərhələsinə qədəm qoyub". Senatorların sözlərinə görə, seçki kampaniyasında əhalinin böyük əksəriyyətinin dəstəklədiyi Avropa inteqrasiyasını davam etdirmək barədə verilən vədlərə baxmayaraq, hökumət bu mövqedən geri çəkilib və konstitusiya öhdəliyini pozub. Bunun fonunda gürcü vətəndaşlarının dəyişiklik tələb etməklə küçələrə çıxdığı, hökumətin isə seçicilərin narahatlığını dinləmək və müxalifətlə dialoq aparmaq əvəzinə, ilboyu etirazların qarşısını almaq üçün sərt addımlar atdığı vurğulanır.

"Onlar avtoritar qanunlar qəbul etdilər, siyasi müxalifət nümayəndələrini həbs etdilər və onlara qadağalar qoydular, vətəndaş cəmiyyəti liderlərini qorxutdular, həmçinin ABŞ-yə və Amerika səfirliyinin əməkdaşlarına qarşı böhtan kampaniyası apardılar", - bəyanatda qeyd olunur.

Senatorlar Gürcüstan hökumətinin "ölkə daxilində artan siyasi zorakılıq fonunda öz xalqına qarşı sərt tədbirlərindən narahat olduqlarını" da bildiriblər.

"Amerikalılar kimi biz gürcü xalqının azadlığından heç bir halda imtina etməmək iradəsini yüksək qiymətləndiririk. Gürcüstanın yaxın dostları olaraq, ölkədə bir il ərzində baş verən siyasi hadisələri diqqətlə izləyirik və bu dövlətin uğurunda maraqlıyıq. Gürcü xalqı öz gələcəyini müəyyən etmək hüququna hörmət edən hökumətə layiqdir", - deyə ABŞ senatorları bəyan ediblər.