Eçmiədzin ruhani rəhbərləri: Dövlətin kilsə işlərinə müdaxiləsi qəbuledilməzdir – ÖZƏL

Olaylar.az xəbər verir ki, Eçmiədzin Birincitaxtlı Konqreqasiyasının arximandritləri kilsənin daxili idarəçiliyinə dövlət müdaxiləsini pisləyən bəyanat yayıb. Bəyanatda vurğulanır ki, hakimiyyətin müxtəlif "mexanizmlərlə" kilsə rəhbərliyinə və ruhani şəxslərə təzyiq göstərməsi, eləcə də Katolikosun taxtdan imtinası ilə bağlı gündəliyi irəlilətmək üçün kilsə birliyini pozmaq cəhdləri yolverilməzdir.

Ruhanilər bildiriblər ki, bütün ermənilərin Katolikosu - Ermənistan Apostol Kilsəsinin başçısı - Milli Kilsə Yığıncağı tərəfindən seçilir və müqəddəsləşdirilir. Onlar din xadimlərinə və möminlərə çağırış edərək, böhtan və hücumlar fonunda ruhani həyatdan uzaqlaşmamağa, kilsədən üz çevirməməyə səsləyiblər.

Bəyanatda qeyd olunur ki, bu çətin dönəmdə kilsə həyatında fəal iştirak vacibdir.

Ermənistan hökuməti ilə Apostol kilsəsi arasındakı gərginlik Baş nazir Nikol Paşinyanın sosial şəbəkələrdə kilsə rəhbərliyini sərt tənqid etməsindən sonra artıb. Daha sonra Paşinyan Katolikosun seçilmə qaydasının dəyişdirilməsi və bu prosesdə dövlətin həlledici rol oynaması təklifilə çıxış edib, həmçinin Katolikosun vəzifədən uzaqlaşdırılması üçün hərəkatı şəxsən idarə edəcəyini bildirib.