Aİ: Ukrayna korrupsiyayla ciddi mübarizə aparmasa, üzvlük riski altındadır – ÖZƏL

Avropa İttifaqının ədliyyə komissarı Maykl Makqrat bildirib ki, Ukrayna korrupsiyaya qarşı yüksək səviyyədə effektiv mübarizə aparmasa, Aİ-yə üzvlük prosesində irəliləyiş əldə edə bilməyəcək. 

Olaylar.az xəbər verir ki, o, Politico-ya müsahibəsində qeyd edib ki, Kiyev səylər göstərsə də, ittifaq hər bir namizəd ölkədən güclü araşdırma və məhkəmə mexanizmləri tələb edir.

Bu açıqlama Ukraynanın enerji sektorundan təxminən 100 milyon dollar mənimsəmə iddialarına dair genişlənən istintaq fonunda səslənib. İttihamlar prezident Volodimir Zelenskiyə yaxın bəzi yüksək vəzifəli şəxsləri də əhatə edir. Antikorrupsiya qurumları Zelenskinin əsas müşaviri Andrey Yermakın ofisində də axtarış aparıb. Daha sonra Zelenski Yermakı vəzifədən azad edərək "şayiələrə yer vermək istəmədiyini" bildirib.

İstintaq ABŞ prezidenti Donald Trampın Kiyevdən Rusiyayla sülh razılaşmasına getməsi üçün təzyiqi artırdığı həssas bir dövrdə aparılır.