Qazaxıstan və Qırğızıstan arasında tibbi əməkdaşlıq genişlənir – ÖZƏL

Qazaxıstan və Qırğızıstanın səhiyyə nazirləri birgə dərman tədarükü, preparatların qeydiyyatı və GMP (Yaxşı İstehsalat Təcrübəsi) standartları üzrə təcrübə mübadiləsi məsələlərini müzakirə ediblər. 

Olaylar.az xəbər verir ki, bu barədə ArbatMedia məlumat yayıb.
Görüş Almatı şəhərində yerləşən Milli İnfeksion Xəstəliklər Elmi Mərkəzində baş tutub. Qazaxıstan tərəfinə Səhiyyə naziri Akmaral Alnazərova, Qırğızıstan tərəfinə isə Nazirlər Kabinetinin sədr müavini Edil Baysalov rəhbərlik edib.

Görüşün əsas mövzuları dərmanların qeydiyyatının sürətləndirilməsi, birgə tədarük sisteminin inkişafı və vahid İstehsalat Təcrübəsi (GMP) standartlarının tətbiqi olub.
Tərəflər həmçinin infeksion və xroniki xəstəliklərlə mübarizədə təcrübə mübadiləsini, eləcə də tibbi kadr hazırlığı sahəsində əməkdaşlığı müzakirə ediblər.

Xüsusi diqqət onkoloji yardım sahəsinə ayrılıb. Qazaxıstan, yeni Proton Mərkəzinin işi də daxil olmaqla, yüksək texnologiyalı müalicə üsullarının inkişaf etdirilməsi planlarını təqdim edib.

Tərəflər Qırğızıstan vətəndaşlarının Qazaxıstanda uşaq onkohematoloji yardımı ala bilmələri və mürəkkəb klinik hallar üzrə konsultasiyalardan faydalana bilmələri barədə razılığa gəliblər.
Həmçinin Qırğızıstanın uşaq kardiocərrahiyyəsi və yetkin onkologiyası sahəsində beynəlxalq layihələrdə iştirakı məsələsi də müzakirə olunub. Hər iki nazirlik, mütəxəssislər arasında peşəkar əlaqələrin möhkəmləndirilməsinin tibbi yardımın keyfiyyətini yüksəltməkdə əsas rol oynadığını vurğulayıb.

Akmaral Alnazərova qeyd edib ki, ölkələr arasında dialoq davam edəcək və tibb sahəsində əməkdaşlıq birbaşa olaraq hər iki ölkə vətəndaşlarının maraqlarına xidmət edir.