Pentaqon Milli Müdafiə Strategiyasının açıqlanmasını təxirə salır - ÖZƏL

ABŞ Pentaqonu hökumətin fəaliyyətinin dayandırılması (şatdaun)  və hərbi rəhbərliyin tənqidlərinə görə yeni Milli Müdafiə Strategiyasının (MMS) açıqlanmasını təxirə salacaq. Olaylar.az xəbər verir ki, bu barədə Politico qəzeti etibarlı mənbələrə istinadla xəbər verib. Məlumata görə, əvvəlcə avqust ayında yayımlanması planlaşdırılan hesabat oktyabr ayına təxirə salınıb, çünki Pentaqon rəhbərliyi sənədin detallarını müzakirə edirdi. İndi isə hökumətin işinin dayandırılması və sənədin son variantı ilə bağlı davam edən fikir ayrılıqları səbəbindən hesabatın bu ay ümumiyyətlə yayımlanmaması ehtimalı var.
Əvvəlki açıqlamalara görə, ABŞ yeni MMS-də diqqəti Rusiya və Çin-in əngəllənməsindən uzaqlaşdıraraq, kontinentlərinin müdafiəsi və Qərb yarımkürəsində təhlükəsizliyin təmin edilməsinə yönəltməyi planlaşdırır. Sənəddə prioritet "daxili və regional missiyalara" verilir, Rusiya və Çin kimi rəqiblərlə qarşıdurma ikinci plana keçir.
Xatırladaq ki, ABŞ-ın əvvəlki qeyri-məxfi MMS versiyası 2022-ci ilin oktyabr ayında Co Bayden administrasiyası tərəfindən açıqlanmışdı. Həmin sənəddə ABŞ-ın Rusiyanı əngəlləməyə və Çin ilə rəqabətdə üstünlük əldə etməyə çalışacağı bildirilirdi, Rusiya isə qlobal nizam üçün birbaşa təhlükə kimi qiymətləndirilirdi. Donald Tramp administrasiyası dövründə isə MMS 19 yanvar 2018-ci ildə açıqlanmış və ABŞ-ın uzunmüddətli strateji rəqabətini Rusiya və Çin ilə əlaqələndirdiyi vurğulanmışdı.