İran Aİ-nin “fars körfəzi məsələlərinə müdaxiləsinə” etiraz edib – ÖZƏL

İran Avropa İttifaqının (Aİ) Fars körfəzi ilə bağlı "intervensiya xarakterli mövqeyi"nə etiraz olaraq Tehrandakı Aİ ölkələrinin səfirlərini Xarici İşlər Nazirliyinə çağırıb. 

Olaylar.az xəbər verir ki, bu barədə "Mehr" agentliyi məlumat yayıb.

XİN-in məlumatına görə, Fars körfəzi Əməkdaşlıq Şurası (PGCC) və Aİ xarici işlər nazirlərinin birgə bəyanatında Birləşmiş Ərəb Əmirliklərinin Böyük Tomb, Kiçik Tomb və Abu Musa adalarına dair əsassız ərazi iddialarına dəstək verilməsi, həmçinin İranın müdafiə və nüvə proqramına dair qeydlər Tehranda narazılıq doğurub.

İranın siyasi məsələlər üzrə nazir müavini Məcid Taxt-Rəvançi səfirlərlə görüşdə ölkəsinin sözügedən adalar üzərində "tam və daimi suverenliyini" təsdiqləyib və Aİ-nin bu məsələdə mövqeyini beynəlxalq hüququn prinsiplərinin pozulması kimi qiymətləndirib.

O, həmçinin Aİ-nin İranın raket proqramı ilə bağlı şərhlərini "ölkənin daxili işlərinə açıq müdaxilə" adlandırıb və vurğulayıb ki, İranın müdafiə qabiliyyəti regional sabitliyin əsas dayaqlarından biridir.

Taxt-Rəvançi Fransanın, Almaniyanın və Böyük Britaniyanın nüvə sazişi (JCPOA) üzrə öhdəliklərini yerinə yetirmədiyini bildirib və Aİ-ni "məsuliyyətsiz və dağıdıcı davranışına görə cavabdeh olmağa" çağırıb.