Politico: Fransadakı siyasi qeyri-sabitlik Avropa İttifaqını zəiflədə bilər - ÖZƏL

Fransada hökumətdə baş verən kadr dəyişiklikləri fonunda yaranan siyasi qeyri-sabitlik Avropa İttifaqının (Aİ) zəifləməsinə və avrozonada iqtisadi vəziyyətin pisləşməsinə səbəb ola bilər. Olaylar.az xəbər verir ki, bu barədə Politico nəşri Avropa mənbələrinə istinadən məlumat yayıb. Nəşrin məlumatına görə, avrozonanın iqtisadiyyatı artıq bir çox narahatlıqlar doğurur. Avropa diplomatlarından biri bildirib:
"Fransa o qədər böyük dövlətdir ki, onun sarsılması bütün avrozonanı risk altına sala bilər. Bu gün bu məsələ Avropada əsas müzakirə mövzusudur". Bəzi Brüssel diplomatlarının fikrincə, Fransa prezidenti Emmanuel Makronun Aİ-dəki nüfuzu zəifləyib və o, "çolaq ördək" kimi görünür. Diplomatlar qeyd ediblər ki, Aİ büdcəsinin müzakirəsi daha asan olardı, əgər Fransa danışıqlara hər dəfə eyni maliyyə naziri ilə qatılardı.
Ekspertlərin fikrincə, Fransada mümkün növbədənkənar seçkilər Aİ-nin uzunmüddətli büdcəsinin qəbulunu təhlükə altına qoya bilər. Müxalifətin hakimiyyətə gəlməsi halında büdcə debatlarının dayanacağı ehtimal edilir.
Politico yazır ki, Fransadakı siyasi böhran Almaniya və Böyük Britaniya ilə birgə həyata keçirilən layihələrə, o cümlədən "istəklilərin koalisiyası" təşəbbüsünə də mənfi təsir göstərə bilər. Avrozonadan olan bir məmur bildirib ki, "Aİ üçün üzv dövlətlərdən birinin qarışıqlıq içində olması, xüsusən də təhlükəsizlik baxımından bu qədər həssas dövrdə, arzuolunan deyil".
Fransalı rəsmilər isə baş nazir Sebastyan Lekornyunun istefasına sakit reaksiya veriblər. Onların sözlərinə görə, "çətin vəziyyətə baxmayaraq, ölkənin iqtisadiyyatında hələ də 'kabində pilot var'".
Xatırladaq ki, Sebastyan Lekornyu yeni hökumətin tərkibinin açıqlanmasından bir gün sonra, müxalifətin kəskin tənqidlərindən sonra prezident Emmanuel Makrona istefa ərizəsini təqdim edib. Yeni kabinetdəki 18 vəzifədən 13-ü əvvəlki nazirlərə həvalə edilib. Ən çox tənqid olunan qərarlardan biri müdafiə naziri postuna sabiq iqtisadiyyat və maliyyə naziri Bryuno Le Merin təyinatı olub. Müxalifət liderləri hökumətin və hətta parlamentin buraxılmasını, eləcə də prezident Makronun istefasını tələb ediblər.