ABŞ İmmiqrasiya Xidmətinə ekstremist hücum təhlükəsi barədə xəbərdarlıq - ÖZƏL

ABŞ-ın Daxili Təhlükəsizlik Nazirliyi (DHS) və Federal Təhqiqat Bürosu (FBI) "radikal ekstremistlər" tərəfindən ABŞ İmmiqrasiya və Gömrük Xidməti (ICE) obyektlərinə hücum riski barədə xəbərdarlıq yayıblar. Olaylar.az xəbər verir ki, bu barədə CBS News məlumat verib. Xəbərdarlıqda ABŞ-ın üç ştatında ICE obyektlərinə edilən hücumlar qeyd olunub və hadisələrin zorakılıq səviyyəsinin artdığı vurğulanıb. Vəzifəli şəxslər bildiriblər ki, ekstremistlər hələ də ICE infrastrukturu və obyektlərini öz siyasi və sosial məqsədlərinə nail olmaq üçün potensial hədəf kimi görürlər.
DHS və FBI vətəndaşlardan "bəsirətlilik nümayiş etdirərək, potensial zorakılıq hallarını aşkar etmək, qarşısını almaq və dayandırmaq" üçün diqqətli olmağı xahiş ediblər.
Qeyd edək ki, 24 sentyabrda Texas ştatının Dallas şəhərində bir şəxs ICE obyektinin yaxınlığında atəş açıb. Hücum nəticəsində ən azı iki nəfər həlak olub. Hadisəni törədən şəxs istifadə etdiyi patronlarda ICE-ə qarşı tənqidi yazılar yerləşdirib.
ABŞ Prezidenti Donald Tramp isə bir neçə dəfə miqrasiya siyasətinin sərtləşdirilməsini müdafiə edib və ölkə tarixində ən geniş miqrant deportasiyası əməliyyatını həyata keçirməyi planlaşdırdığını bəyan edib.