ABŞ-da “şətdaun”a saatlar qaldı – Trampla görüş nəticəsiz başa çatdı

ABŞ prezidenti Donald Trampın Demokratlar və Respublikaçıların Konqres liderləri ilə hökumətin müvəqqəti maliyyələşdirilməsi ilə bağlı görüşü heç bir əhəmiyyətli nəticə vermədən başa çatıb. Olaylar.az The Hill-ə istinadən xəbər verir ki, bu, hökumətin fəaliyyətinin qismən dayanması ehtimalını kəskin şəkildə artırır.

Bildirilir ki, "2Demokratlar, Respublikaçılar və administrasiya rəsmiləri Ağ Evdəki iclası bir-birilərinə barmaq silkələyərək tərk etdilər, görünür, hökumətin bağlanmasının qarşısını almağa heç yaxınlaşmayıblar". İclasda iştirak edən Senat azlıqlarının lideri Çak Şumer jurnalistlərə bildirib ki, Demokratlar və Respublikaçılar arasında səhiyyə də daxil olmaqla əsas məsələlərdə "çox böyük fikir ayrılıqları" var.

Vitse-prezident J.D.Vens isə demokratları əsassız tələblər irəli sürməkdə ittiham edib: "Düşünürəm ki, biz hökumətin bağlanmasına doğru gedirik, çünki Demokratlar düzgün iş görmürlər".

Hazırda ABŞ-ın mart ayında qəbul edilmiş müvəqqəti federal maliyyələşdirmə qanununun müddəti sentyabrın 30-da başa çatır.

Nümayəndələr Palatası əvvəllər müvəqqəti maliyyələşdirməni noyabrın 21-dək uzadacaq qanun layihəsini təsdiqləmişdi. Layihə Senat tərəfindən təsdiqlənməyib, burada respublikaçıların 100 səsdən 53 səsi var və qanun layihəsinin qəbulu üçün 60 səs lazımdır.

Tramp ötən həftə hökumətin fəaliyyətinin dayanmasına görə demokratların məsuliyyət daşıyacağını bildirib.

CNN-ə görə,  bu dəfə hökumətin fəaliyyətinin dayanması əvvəlkilərdən kəskib fərqlənəcək. Belə ki, Ağ Evin İdarəetmə və Büdcə İdarəsi artıq dövlət qurumlarına bağlanma halında "Trampın prioritetlərinə uyğun gəlməyən proqramlarda" işçilərin ixtisarı üçün planlar hazırlamağı tapşırıb. Respublikaçılar bağlanmanın məsuliyyətini demokratların üstünə qoymaqla, ondan hökumətdə ciddi ixtisarlar aparmaq üçün istifadə etməyə hazırlaşırlar.