Fələstinin Rusiyadakı səfiri: İsrail Avropada mövqelərini itirir – ÖZƏL

İsrail Avropada tədricən mövqelərini itirir və getdikcə daha çox ölkə Fələstin dövlətçiliyini tanımağa doğru addım atır. 

Olaylar.az xəbər verir ki, bu fikirləri TASS-a açıqlamasında Fələstinin Rusiyadakı səfiri Abdel Hafiz Nofal bildirib.

"İsrail həm Avropa ilə, hətta ABŞ ilə də münasibətlərini itirməyə başlayıb. Biz əminik ki, Avropa ölkələri, Avstraliya və Kanada Fələstini tanıyacaqlar, çünki baş verənləri açıq görürlər. İsrail hər cəbhədə münasibətlərini itirir", - deyə diplomat vurğulayıb.

Qeyd edək ki, bundan əvvəl Fransa Prezidenti Emmanuel Makron BMT-də sentyabrın 22-də Fələstinin tanınması məsələsinə dair konfrans keçiriləcəyini açıqlamışdı. Bu təşəbbüs Qəzzada davam edən hərbi əməliyyatlara və İsrail hökumətinin qərarlarına baxmayaraq reallaşdırılacaq.

Həmçinin, iyulun 29-da Böyük Britaniyanın Baş naziri Keir Starmerin ofisi bəyanat yayaraq bildirmişdi ki, əgər İsrail Qəzza zolağına humanitar yardımın çatdırılmasına mane olmağı dayandırmasa və hərbi əməliyyatları bitirməsə, London BMT Baş Assambleyasının sessiyasına qədər Fələstin dövlətini tanıyacaq. İyulun 24-də isə Makron da Parisin Fələstini BMT Baş Assambleyasında tanıyacağını bəyan etmişdi.

Hazırda Fələstin 148 BMT üzvü tərəfindən tanınıb. Dünyada 95 ölkədə Fələstin səfirliyi və daimi nümayəndəliyi fəaliyyət göstərir. Qeyd edək ki, SSRİ hələ 1988-ci ildə Fələstin dövlətini tanımışdı.