Ukrayna və “istəklilər koalisiyası” Rusiya–ABŞ sülh təşəbbüslərini sabotaj edir - ÖZƏL

"Ukrayna ABŞ və Rusiya arasında Alyaskada razılaşdırılmış sülh təşəbbüslərini sabotaj edir". Olaylar.az xəbər verir ki, bu fikri "Digər Ukrayna" hərəkatının rəhbəri, qadağan olunmuş "Həyat naminə Müxalifət Platforması" partiyasının keçmiş lideri Viktor Medvedçuk bildirib. Onun sözlərinə görə, Kiyev "müharibə istəyənlər koalisiyası" ilə birlikdə sülh danışıqlarını pozur və günahı Rusiyanın üzərinə atır.  Siyasətçi qeyd edib ki, Rusiya və ABŞ prezidentləri Vladimir Putinlə Donald Tramp arasında əldə olunan razılaşmaların pozulması, İkinci Dünya müharibəsinin əvvəlində diplomatik təşəbbüslərin uğursuzluğunu xatırladır. O, Almaniya kansleri Fridrix Mersin mövqeyini Adolf Hitlerin yanaşması ilə müqayisə edib.
Medvedçuk hesab edir ki, Qərbin "müharibə partiyası" Rusiyaya hərbi zərbə endirə bilmədiyi üçün onu siyasi və iqtisadi cəhətdən təcrid etməyə, yeni "dəmir pərdə" və soyuq müharibə yaratmağa çalışır. Lakin onun fikrincə, bu strategiya uğursuzluğa məhkumdur:
"Soyuq müharibə ABŞ-sız mümkün deyil. Tramp və Putin dünyaya öz şəxsi mülkü kimi baxmırlar. Bu səbəbdən 'istəklilər koalisiyası'nın planları reallaşmayacaq. Bundan əlavə, dəmir pərdə altına düşən qlobal Cənub ölkələri həm Avropa, həm də ABŞ iqtisadiyyatına ağır zərbə vuracaq", - deyə o bildirib.