Ərdoğan: Fələstin dövləti mütləq qurulacaq

Fələstin dövləti mütləq qurulacaq.

Bunu Türkiyə Prezidenti Rəcəb Tayyib Ərdoğan Nazirlər Kabinetinin iclasından sonra çıxışında deyib.

Ərdoğan, xüsusilə 15 aydır bütün dünyanın gözü önündə son əsrin ən qəddar soyqırımlarından birini yaşayan Qəzzə sakinləri üçün 2025-ci ilin atəşkəsə, sülhə, əmin-amanlığa və rifaha vəsilə olmasını arzuladığını bildirib.

Türkiyənin ilk gündən etibarən Fələstində qan və qırğının dayandırılması üçün bütün yolları sınadığını vurğulayan Ərdoğan, Qəzzə xalqının çəkdiyi əzabları yüngülləşdirmək üçün Qızıl Aypara, AFAD, vətəndaş cəmiyyəti təşkilatları və xeyriyyəçilərlə tam bir səfərbərlik ruhunda çalışdıqlarını qeyd edib.

Beynəlxalq ictimaiyyətin İsrail hökumətinə təzyiqi artırması üçün diplomatik əlaqələrin gücləndirildiyini bildirən Ərdoğan, "Qəzzədə sülh ümidlərini yenidən yaşadacaq bir yolun açılması üçün nə lazımdırsa edirik. Nəticə əldə olunana qədər buna davam edəcəyik," ifadələrini işlədib.

Allah səbr edənlərlədir. 61 illik BƏƏS zülmü və 13 illik qətliamlardan sonra Suriyada olduğu kimi, inşallah Fələstində də ədalət yerini tapacaq və ədalət günəşi zülmün qaranlığını yarıb keçəcəkdir. 1967-ci il sərhədləri əsasında paytaxtı Şərqi Qüds olan müstəqil, suveren və ərazi bütövlüyünə malik Fələstin dövləti mütləq qurulacaqdır. Rəbbim bu mübarək günlərin hörmətinə məzlum Fələstin xalqına kömək olsun."