Mask Rusiyanın Ayda atom enerji qurğusunun quraşdırılmasını şərh edib – ÖZƏL

SpaceX aerokosmik şirkətinin təsisçisi və rəhbəri İlon Mask Rusiyanın Ay səthinə atom enerji qurğusu yerləşdirmə perspektivini maraqlı hesab edib. 

Olaylar.az xəbər verir ki, o, bu barədə sosial şəbəkə X-də yalnız bir söz yazıb: "Maraqlı."

Bu layihə haqqında daha əvvəl Roskosmos məlumat yayıb. Bildirilib ki, bu işlər Çinlə birgə aparılır və 2035-ci ilə qədər Beynəlxalq Elmi Ay Stansiyasının inşası başa çatmalıdır. Layihənin 2023-2030-cu illəri əhatə edən mərhələsində enmə, yük daşınması və Ay torpağının Yerə qaytarılması texnologiyalarının sınaqdan keçirilməsi nəzərdə tutulur.

Rusiyanın bu layihəyə töhfəsi çərçivəsində, 2033-2035-ci illərdə Ay səthinə atom enerji qurğusunun çatdırılması və quraşdırılması planlaşdırılır. Bu enerji qurğusu gələcəkdə Ay bazalarının enerji təchizatını təmin etmək məqsədi daşıyır.

Ayda atom enerji qurğusunun tətbiqi ideyası həm aerokosmik sahədə, həm də elmi dairələrdə böyük maraq doğurur və bu istiqamətdə texnoloji nailiyyətlərin inkişafına təkan verə bilər.