Bakıda ağırlıqqaldıranların beynəlxalq turniri keçiriləcək
Dekabrın 27-də AAAF Park yaşayış Kompleksinin yarış zalında Milli Qəhrəman Fəxrəddin Şahbazovun xatirəsinə həsr olunmuş ağırlıqqaldıranların beynəlxalq turniri keçiriləcək. "OLAYLAR"-ın Gənclər və İdman Nazirliyinə istinadən verdiyi xəbərə görə, turnir sayca 15-ci olacaq və ilk dəfə beynəlxalq status daşıyacaq. Yarışın məqsədi səbəbkarın timsalında Vətən uğrunda şəhid olmuş soydaşlarımızın xatirəsinin əziz tutulmasıdır. Yarışın keçirilməsində əsas məqsədlərdən biri, F.Şahbazovun şərəfli həyat yolunun və idman fəaliyyətinin böyüməkdə olan yeni nəsil idmançılar və gənclər arasında təbliğidir. Həmçinin yerlərdə ağır atletika idman növünün təbliğ olunması və inkişaf etdirməsi, ən güclü idmançıların aşkarlanması, şəhər yığma komandasına namizədlərin seçilməsi, idmançıların ustalıq səviyyəsinin artırılmasıdır. Yarışda Azərbaycanla yanaşı, daha 6 ölkədən ağırlıqqaldıranların çıxışı gözlənilir.