İrəvan Türkiyə ilə danışıqlarda yeni xüsusi nümayəndə təyin etməyə tələsmir – ÖZƏL

Olaylar.az xəbər verir ki, Ermənistan Türkiyə ilə münasibətlərin normallaşdırılması üzrə yeni xüsusi nümayəndə təyin etməyə tələsmir. "Orbeli" mərkəzinin eksperti Armen Petrosyanın fikrincə, tərəflər arasında artıq liderlər və Xarici İşlər nazirlikləri səviyyəsində doğrudan əlaqələr qurulduğu üçün bu vəzifəyə zərurət qalmaya bilər.

Ruben Rubinyan parlamentin vitse-spikerliyinə namizəd göstərildikdən sonra vakant qalan bu posta hələ ki yeni təyinat olunmayıb. Baş nazir Nikol Paşinyan da Türkiyə ilə gələcək qarşılıqlı fəaliyyət formatının dəqiqləşdirilməli olduğunu bildirib.

Ekspert qeyd edir ki, normallaşma prosesi faktiki olaraq Bakının mövqeyindən asılıdır. Ankara İrəvanla dialoqu Ermənistan-Azərbaycan danışıqlarının nəticələri ilə şərtləndirməkdə davam edir. 1993-cü ildən bağlanan sərhədlərin açılması və 2022-ci ildə üçüncü ölkə vətəndaşları üçün əldə olunmuş razılaşmanın icrası da məhz bu amilə görə ləngiyir.