"Amnesty International" şok hesabat yaydı- Edamların 80 faizi tək bir ölkənin payına düşür

Beynəlxalq insan hüquqları müdafiəsi təşkilatlarının apardığı son qlobal araşdırmalar dünyada qanuniləşdirilmiş ölüm hökmlərinin tətbiqində vahiməli və rekord səviyyədə artım olduğunu üzə çıxarıb.

Musavat.com xəbər verir ki, "Amnesty International" (AI) beynəlxalq hüquq-müdafiə təşkilatının illik hesabatına əsasən, ötən 2025-ci ildə dünyada qeydə alınan ölüm cəzalarının sayı demək olar ki, iki dəfə artıb. Təşkilat il ərzində qlobal miqyasda rəsmən 2707 edam hadisəsi qeydə alıb ki, bu da cəmi bir il əvvəlki göstəricidən (1518 edam) rəsmən 78 faiz çoxdur. Bu dəhşətli rəqəm Çin istisna olmaqla, dünyada 3191 ölüm hökmünün icra edildiyi 1981-ci ildən bəri qeydə alınan ən yüksək qlobal antirekorddur. Hüquq müdafiəçiləri dövlət tərəfindən həyata keçirilən bu qətllərin kəskin artmasının əsas səbəbi kimi birinci növbədə İrandakı mövcud daxili vəziyyəti göstərirlər.

Belə ki, ötən il İranda son onilliklərin ən yüksək edam göstəricisi - azı 2159 ölüm hökmü icra edilib ki, bu da həm ölkənin özünün 2024-cü il göstəricisindən iki dəfə çoxdur, həm də dünyada qeydə alınan bütün edamların bütövlükdə 80 faizini təşkil edir. Ekspertlər xəbərdarlıq edirlər ki, dünyada edam edilən insanların real sayı, əslində, bu rəqəmlərdən qat-qat çox ola bilər. Çünki rəsmi statistika ölüm hökmünü dövlət sirri kimi tam gizli saxlayan və bu cəzanı kütləvi şəkildə tətbiq etməkdə davam edən Çin, Şimali Koreya (KXDR) və Vyetnamda edam edilən minlərlə insanın real sayını əks etdirə bilmir.