“Avropalı “müşahidəçilər” sülhü riskə atır”-Təbriz Ağayev
"Artıq 6 ildir ki, Cənubi Qafqazda yeni reallıqlar yaranıb. Azərbaycan öz gücünə 30 il ölkəni və bütövlükdə regionu inkişafdan saxlamış Qarabağ münaqişəsini həll edib. 2023-cü ildən ölkənin bütün ərazilərində suveren hüquqlarımız bərpa edilib. Amma hələ də Ermənistanda "bəlkə də qaytardılar" ümidi ilə yaşayan qüvvələr var. Bu revanşist güclər Qarabağı yenidən siyasi oyunlara alət etmək istəyirlər. Lakin keçmişi qaytarmaq mümkün deyil. Qarabağ münaqişəsi rus imperiyasının, SSRİ-nin mirası idi, Azərbaycan bu yaranı dost və qardaş dövlətlərin yardımı ilə kəsib atmağı bacardı". Bu sözləri Olaylar.az-a açıqlamasında "Bakı və Regionların Birgə İnkişafı" Platforması İctimai Birliyinin sədri Təbriz Ağayev deyib. Onun sözlərinə görə, revanşist qüvvələrin aktivləşməsinə səbəb Ermənistanda keçirilən parlament seçkilərdir: "Sabiq iqtidar təmsilçilərinin radikal bəyanatları əslində seçkiqabağı təşviqatla bağlıdır, onlar qisas hissi ilə yaşayan kəsimi hərəkətə gətirmək istəyirlər. Lakin erməni xalqının seçimi bəllidir. Ermənistan cəmiyyəti müharibə istəmir. 44 günlük müharibədən az sonra keçirilən seçkilərdə belə Nikol Paşinyan qalib gəldi. Bu seçkilərdə də Azərbaycan və Türkiyə ilə münasibətlərin normallaşdırılmasını istəyən güclərin: yəni indiki iqtidarda olan qüvvələrin qalib gələcəyinə şühhə yoxdur. Amma narahatlıq doğuran məqamlar da yox deyil. Məsələn, son zamanlar
Ermənistan-Azərbaycan şərti sərhədində fəaliyyət göstərən Avropa müşahidə missiyası ilə bağlı müxtəlif beynəlxalq platformalarda və sosial mediada müzakirələrin artması narahatedicidir. Bu onu göstərir ki, Ermənistandakı revanşist qüvvələr Qərbdən güc və təlimat alırlar. Hələ də Qərbdə, xüsusilə Fransada Cənubi Qafqazda artıq xeyli məsafə qət etmiş sülh prosesinə əngəl olmaq istəyən güclər var. Sual olunur ki, Azərbaycan və Ermənistan bəzi hallarda vasitəçi ilə, bəzi hallarda isə ikitərəfli təmaslarla sülh prosesini uğurla aparırsa, kənar müdaxiləyə nə ehtiyac var. Sərhədlərin bir qismi ilə bağlı delimitasiya məsələləri razılaşdırılıb. Ermənistan cəmiyyətinin böyük əksəriyyəti və hakim siyasi qüvvə Azərbaycanla qalıcı sülhə arzulayır. Xalqın səsini almış Paşinyan iqtidarı Azərbaycanla və Türkiyə ilə quru sərhədlərinin açılmasını, ticarət əlaqələrinin bərpasını istəyir. Belə bir halda Ermənistan-Azərbaycan şərti sərhədində fəaliyyət göstərən Avropa müşahidə missiyasının aktivləşməsi şübhəli suallar doğrurur. "Müşahidəçilərin" tərəfsiz açıqlamaları vəziyyəti daha da qəlizləşdirir. Onlar kövrək sülhə töhfə verməkdənsə, qaşınmayan yerdən qan çıxarmağa çalışırlar".
QHT sədri deyib ki, tərəflər dayanıqlı sülhə doğru bu qədər məsafə qət ediblərsə, bu prosesə əngəl olmağa ehtiyac yoxdur:
"Kimlərsə müşahidə missiyası adı ilə pozuculuqla məşğul olursa, bu, heç də yaxşı bir hal deyil. Onlar erməni xalqının təhlükəsizliyini, gələcəyini risk altına qoyurlar. Sabah sərhəddə hər hansı bir eskalasiya olacaqsa, bölgədən ilk qaçan elə müşahidəçilər olacaq. Amma bu hal baş verməyəcək. Çünki regionda sülhün təminatçısı güclü orduya malik Azərbaycan dövlətidir. İki ölkə arasında sülh danışıqları, sərhədlərin müəyyən olunması ilə bağlı təmaslar uğurla davam edir. Yəqin ki, seçkidən sonra ciddi irəliləyişlər də görəcəyik. Qərbdəki bəzi siyasi çevrələrin, Emrənistandakı azsaylı qisasçı güclərin təxribatçı davranışları nəticəsiz qalacaq".