Maskatda kritik zirvə: İran və ABŞ birbaşa danışıqlara başladı

Bu gün Omanın paytaxtı Maskatda İran və ABŞ nümayəndə heyətləri arasında nüvə proqramı və sanksiyaların ləğvi üzrə həlledici danışıqlar başlayıb.

Musavat.com xəbər verir ki, görüşün formatı və gündəliyi ilə bağlı həftə ərzində davam edən qeyri-müəyyənlikdən sonra tərəflər yerli vaxtla saat 10:00-da masaya oturublar.

Danışıqlarda ABŞ nümayəndə heyətinə Yaxın Şərq üzrə xüsusi elçi Stiv Uitkoff rəhbərlik edir. Görüşdə həmçinin ABŞ-ın yeni administrasiyasının xüsusi məsləhətçisi Cared Kuşnerin də iştirak etdiyi bildirilir. İran tərəfini isə xarici işlər naziri Abbas Araqçinin başçılıq etdiyi geniş diplomatik heyət təmsil edir.

Türkiyədən Omana: Danışıqların yeri niyə dəyişdi?

İlkin planlara görə, görüşün İstanbulda, regional ölkələrin iştirakı ilə geniş tərəfdaşlıq formatında keçirilməsi nəzərdə tutulurdu. Lakin Tehranın təkidli tələbi ilə danışıqlar Muskata köçürülüb və ikitərəfli formata salınıb. İran tərəfi israr edir ki, müzakirələr yalnız nüvə məsələləri və iqtisadi sanksiyaların qaldırılması ilə məhdudlaşmalıdır. Vaşinqton isə masaya İranın raket proqramı və regional fəaliyyətləri kimi daha geniş mövzuları daxil etməyə çalışır.

Gərginlik fonunda "son şans"

Bu görüş ABŞ-ın regionda hərbi gücünü artırdığı və nüvə obyektlərinə mümkün zərbələr barədə xəbərdarlıqların səsləndiyi bir dövrə təsadüf edir. Beynəlxalq müşahidəçilər Maskat danışıqlarını tərəflər arasında de-eskalasiya (gərginliyin azaldılması) üçün "dar bir pəncərə" və müharibə riskindən qaçmaq üçün "son diplomatik cəhd" kimi qiymətləndirirlər.

Oman rəsmiləri görüşün tam məxfi və təhlükəsiz şəraitdə keçməsi üçün bütün tədbirləri görüblər. Müzakirələrin ilkin nəticələri barədə günün sonunda rəsmi açıqlamaların veriləcəyi gözlənilir.