Türkiyənin sosial media seqmentində və bəzi informasiya platformalarında yayılan, Türkiyə prezidenti Rəcəb Tayyib Ərdoğanın guya müharibədə həlak olmuş Ermənistan hərbçilərin ailələrinə və yardıma ehtiyacı olan təbəqələrə 10 milyon dollar məbləğində maliyyə yardımı göstərilməsi barədə qərar imzaladığına dair iddialar rəsmi şəkildə təkzib edilib.

Məsələ ilə bağlı Türkiyə Prezident Administrasiyasının nəzdində fəaliyyət göstərən Dezinformasiyaya Qarşı Mübarizə Mərkəzi rəsmi açıqlama yayıb.

Açıqlamada bildirilir ki, qeyd olunan məzmunlu iddialar tamamilə əsassızdır və həqiqəti əks etdirmir. Prezident tərəfindən belə bir qərarın imzalanması, eləcə də Ermənistanla bağlı hər hansı maliyyə yardımının ayrılması barədə rəsmi sənəd və ya hüquqi akt mövcud deyil.

Rəsmi qurum vurğulayıb ki, sözügedən iddialar məqsədli şəkildə ictimai rəyi çaşdırmaq, eləcə də Türkiyə-Azərbaycan münasibətlərini hədəf almaq xarakteri daşıyır. Bu baxımdan ictimaiyyətə çağırış edilib ki, ölkəni və regional münasibətləri hədəf alan bu tip dezinformasiyalara etibar edilməsin, yalnız rəsmi dövlət qurumlarının açıqlamalarına istinad olunsun.

Açıqlamada həmçinin qeyd olunub ki, sosial şəbəkələrdə yayılan saxta "qərarname" görüntüləri və mətnləri heç bir hüquqi qüvvəyə malik deyil və informasiya təhlükəsizliyi baxımından diqqətlə qiymətləndirilməlidir.

Beləliklə, Türkiyə prezidentinin Ermənistanla bağlı 10 milyon dollarlıq yardım qərarı imzalaması barədə yayılan məlumatlar reallığa uyğun deyil və rəsmi şəkildə yalanlanıb.