Makron gedir, mübarizə başlayır: Fransada böyük siyasi yarış  

Fransada mart ayında keçiriləcək bələdiyyə seçkiləri təkcə yerli hakimiyyətlərin formalaşması ilə məhdudlaşmır. Bu seçkilər 2027-ci ildə keçiriləcək prezident seçkilərinin əsas istiqamətlərini müəyyənləşdirə bilər.

Musavat.com xəbər verir ki, "Politico" portalıının nəşrinin yazarı Viktor Quri Laffontun təhlilinə görə, martın 15 və 22-də baş tutacaq səsvermə ölkədə ifrat sağın nə qədər gücləndiyini, sol qüvvələrin toparlanıb-toparlanmadığını və mərkəzçi düşərgənin siyasi səhnədə qalmaq şansını üzə çıxaracaq.

Seçkilərdə Fransanın 35 mindən çox şəhər və kəndində merlər və bələdiyyə şuraları seçiləcək. Bu isə prosesi faktiki olaraq ölkə üzrə siyasi "sınaq imtahanı"na çevirir.

Fransanın ikinci böyük şəhəri Marseldə əsas mübarizə təhlükəsizlik mövzusu üzərində qurulub.

Son illər narkotik alveri ilə bağlı cinayətlərin artması seçicilərin prioritetlərini dəyişib. İfrat sağçı Milli Birlik Partiyası bu vəziyyəti miqrasiya ilə əlaqələndirərək seçiciləri öz tərəfinə çəkməyə çalışır.

Sorğulara görə, hazırkı mer Benua Payan və Milli Birliyin namizədi Frank Allisio başa-baş gedir. Onları Martin Vassal və Sebastyan Delogü izləyir.

Marin Le Penin şəxsən Marselə gələrək kampaniyada iştirak etməsi bu şəhərə verilən əhəmiyyəti göstərir.

Nim şəhərində uzun illərdir hakimiyyətdə olan sağçı merin siyasətdən getməsi balansı dəyişib.

Burada sol blokun namizədi Vinsent Buje, Milli Birliyin təmsilçisi Julien Sançez və mühafizəkar Franck Prust arasında ciddi rəqabət gedir.

Son illər artan zorakılıq hadisələri seçiciləri sərt təhlükəsizlik siyasətinə daha açıq edib.

Bordo "Yaşıllar"ın hələ də güclü qaldığı azsaylı böyük şəhərlərdən biridir.

Mer Pyer Ürmik həm ekoloji layihələrə, həm də təhlükəsizlik məsələlərinə diqqət yetirməklə balans yaratmağa çalışır.

O, polis qüvvələrini gücləndirib və bu addım sayəsində cinayətlərin azaldığını iddia edir.

Hazırda sorğular Hurmicin rəqiblərindən öndə olduğunu göstərir.

Parisə yaxın Sent-Uen şəhəri sosial dəyişikliklərin ən açıq göründüyü ərazilərdən biridir.

Son illər varlı təbəqənin buraya köçməsi mənzil qiymətlərini artırıb, köhnə sakinlərin sıxışdırılması prosesi sürətlənib.

Hazırkı mer Karim Buamran daha mərkəzçi xətti müdafiə edir. Onun əsas rəqibi Manon Monmirel isə daha radikal sosial proqramlar təklif edir.

Bu yarış sol düşərgənin gələcək kursunu müəyyən edə bilər.

Analitiklərin fikrincə, seçkilərin əsas qalibi ifrat sağ ola bilər.

Marin Le Penin partiyası bir çox şəhərdə real qalibiyyət şansına malikdir. Eyni zamanda Emmanuel Makronun düşərgəsi ciddi seçici itkisi yaşayır.

Sol qüvvələr isə hələ də vahid siyasi xətt formalaşdıra bilməyib.

Mütəxəssislər hesab edir ki, mart seçkiləri Fransa siyasətində yeni mərhələnin başlanğıcı olacaq. Bu nəticələr prezident seçkiləri öncəsi bütün partiyaların strategiyasını dəyişə bilər.

Fransa hazırda həm daxili, həm də Avropa miqyasında kritik dövrə daxil olur.