Amerika və İranın gərgin münasibətləri– ÖZƏL
"Amerikanın İran siyasəti sanki sehrli bir çevrəyə düşüb. Amerika, İranın indiki siyasətini nə həzm edə, nə də apardığı siyasətdən döndərə bilir. Beləliklə, əslində, ABŞ bu gün İranla nə edəcəyini bilməyən bir ölkə təsiri bağışlayır. Hətta çox sərt üsullara əl atılacağı ilə bağlı bəyanatlar olsa da, Amerika İranla bağlı hansı siyasəti aparacağı haqqında qəti qərar vermir. İranı hədələməsinə baxmayaraq onun apardığı siyasəti və bu siyasətin nəticələrini dəqiq hesablaya bilmir. Buna görə də İran-Amerika münasibətlərinin gələcəkdə müxtəlif ssenarilər üzrə davam edəcəyini düşünmək mümkündür.
Bu fikirləri siyasi şərhçi Aydın Quliyev Olaylar.az-a açıqlamasında bildirib:
"Əlbəttə, ən ciddi və təhlükəli ssenarilərdən biri Amerikanın birbaşa İrana zərbə endirməsidir. Artıq müəyyən məlumatlar və kanallarla Pentaqondan dünya ictimaiyyətinə belə bir fikir sızdırılıb ki, İsrail və Amerika İrana son və qəti zərbəni vurmaq üçün planlar üzərində işləyirlər. Prinsipcə, bu hədələyici bəyanatlarda əvvəlki verilmiş bəyanatlardan fərqli bir şey görünmür və nəzərə alsaq ki, əslində, Trampın hakimiyyətə gəlməsindən bəri, 2016-cı ildən bu yana Amerikanın İranla bağlı kəskin və hədələyici bəyanatlarını görürük, bu dəfə də həmin bəyanatların məqsədli şəkildə dünya ictimaiyyətinə sızdırıldığını və sadəcə İranı qorxutmaq və təhdid etmək məqsədini güddüyünü ehtimal etmək olar.
Kəskin hədələyici bəyanatların olmasına baxmayaraq, bu bəyanatlar hələ İranın üzərinə Amerikanın həqiqətən də bütün hərb maşınının gücü ilə zərbə endirəcəyi barədə qəti qənaətə gəlməyə əsas vermir. Eyni zamanda Amerikada da başa düşürlər ki, İran Yaxın Şərqin digər ölkələri, məsələn, İraq və ya Suriya ilə müqayisədə fərqli bir vəziyyətə malikdir. Ona görə də, hər dəqiqə zərbə endirmək və dərhal effekt əldə etmək mümkün deyil. İranın daxilində parçalanma hələ də baş verməyib, baxmayaraq ki, sanksiyalar bir neçə ildir qüvvədədir. Bir neçə dəfə İran daxilində xalq etirazları və narazılıqlar yarandı, amma bunların qarşısı alındı və İranı daxildən zəiflətmək mümkün olmadı. Bu faktorları hesablayaraq, qənaətə gəlirlər ki, İrana hərbi zərbələr endirilməsinin effekti ilə yanaşı əks effekti də ola bilər.
Çünki əgər İran hal-hazırda nüvə silahına sahib deyilsə, bu, onu nüvə silahı əldə etmək istiqamətində daha sürətli addımlar atmağa sövq edər ki, bu da yeni təhlükələrin yaranmasına səbəb ola bilər. Bir sözlə, İranı hədələmək heç də, İrana zərbə vurulması ilə bağlı ciddi planların olduğunu göstərmir. Sadəcə olaraq, məqsəd İranı qorxutmaq və hədələməkdir ki, o, nüvə silahı əldə etməkdən imtina etsin və qərb ölkələrində İranın nüvə silahı əldə etməyəcəyi ilə bağlı inam yaransın".
Zeynəb Rzayeva