İşğalçını müdafiə etməyin fəsadları ağır oldu- Turan Rzayev- ÖZƏL

Rusiya səfiri Sergey Kopırkin, ATƏT-in Minsk qrupunun fəaliyyətinin "dəyişdiyini" və artıq effektiv olmadığını bəyan edib. O, Qərb həmsədrlərinin rusiyalı həmsədrlə işləməkdən imtina etdiyini vurğulayaraq, Minsk qrupunun gələcəyinin qeyri-müəyyən olduğunu qeyd edib. Həmçinin, region məsələlərinin yalnız yerli ölkələr tərəfindən həll edilməli olduğunu və xarici müdaxilələrin qarşısını almağın vacib olduğunu bildirib.

Mövzu ilə bağlı politoloq Turan Rzayev Olaylar.az-a açıqlama verib. Politoloq ATƏT-in Minsk qrupunun işğalçıları müdafiə etdiyini qeyd edib:

"ATƏT-in Minsk qrupu deyə bir qurum faktiki olaraq tanınmır. "Fəaliyyəti" dövründə   Ermənistan - Azərbaycan Dağlıq Qarabağ münaqişəsini həll etməmələri  bu münaqişənin 30 il uzanmasına,  Ermənistanın xeyrinə yekunlaşmasına çalışdı. Düşünürəm  ki, bu fəaliyyətsizlik və qanunsuz mövqeyinə görə rəsmi  Bakı ATƏT-in Minsk qrupunu məhkəməyə verməlidir. 
ATƏT-in Minsk qrupunun həmsədrləri uzun illər ortaq fikirlərlə çıxış edib işğal prosesini uzatsa da, Rusiyanın Ukrayna ərazilərini işğalı vəziyyəti dəyişdi. Əslində bu bir daha işğalçını müdafiə etmənin fəsadları idi.  ABŞ və Fransa Rusiya ilə format çərçivəsində danışıqlardan imtina etdi. Azərbaycan prezidenti İlham Əliyevin də dediyi kimi, regionun problemləri region ölkələri tərəfindən həll edilməlidir. Əgər bu yanaşma illər öncə tədbiq edilsə idi, münaqişə bu qədər uzanmazdı. Hesab edirəm ki,  Prezident İlham Əliyevin təklifi gələcək perspektivdə münaqişələrin həlli baxımından daha effektlidir. Faktiki olaraq bu gün  Azərbaycan - Ermənistan danışıqları davam edir. Bu danışıqlarda kifayət qədər uğurlar əldə edilib. Hətta iki bənd istisna sülh müqaviləsi hazırdır".

Zeynəb Mustafazadə