Zəfərimiz  şanlı tariximizə qızıl hərflərlə yazılıb- ÖZƏL

"Şanlı Azərbaycan Ordusu 44 günlük Vətən müharibəsində misilsiz peşəkarlıq və yüksək rəşadət göstərmiş, 30 ilə yaxın müddətdə düşmən işğalında olan əzəli torpaqlarımızı mənfurlardan azad etmişdir. Bu parlaq Qələbə dünya hərb tarixinə, eləcə də öz şanlı tariximizə qızıl hərflərlə yazılmışdır". "Olaylar" xəbər verir ki, bunu YAP Yevlax rayon təşkilatının sədri Rafiq Əliyev deyib: "Ermənistan və onun havadarlarının bütün terror-təxribat aktlarına, qarayaxma kampaniyalarına, qərəzli addımlarına baxmayaraq, Azərbaycan dövləti öz gücü hesabına tarixi ədaləti bərpa edərək, haqq işini uğurla tamamladı. Bəli, biz haqlı olaraq qeyd edirik ki, Azərbaycan dövləti və xalqı var olduğu müddətdə müharibədə qəhrəmanlıq göstərmiş şəhidlərimizin əziz xatirəsi daim uca tutulacaq, hər zaman ehtiramla yad olunacaqdır. Bu gün şəhid ailələrinə, müharibə veteranlara xüsusi diqqət və qayğının göstərilməsi məhz uğurlu dövlət siyasətinin prioritet istiqamətlərindən biridir".