Spiker: “Prezident İlham Əliyevin rəhbərliyi ilə xalqımızın apardığı 44 günlük Vətən müharibəsi zəfərlə başa çatıb”

Milli Məclisin martin 16-da keçirilən iclasında Nazirlər Kabinetinin illik hesabatı dinləniləcək. "Olaylar" xəbər verir ki, əvvəlcə  parlamentin sədri Sahibə Qafarova ötən ilin yekunları ilə bağlı ümumi məlumat verib. Bildirib ki, bu gün Milli Məclisin yaz sessiyasının 5-ci iclasıdır. Konstitusiyaya uyğun olaraq Nazirlər Kabineti hesabat verir. Sədr bildirib ki, Prezident İlham Əliyevin rəhbərliyi ilə xalqımızın apardığı 44 günlük Vətən müharibəsi zəfərlə başa çatıb: "Qarabağın işğaldan azad edilməsi ölkəmizin qarşısında yeni perspektivlər açıb. Prezidentin də dediyi kimi, şanlı qələbəmiz bütün dünyaya göstərdi ki, sözümüzlə əməlimiz arasında heç bir fərq yoxdur. Bu gün Azərbaycan tarixdə heç vaxt bu qədər güclü olmayıb. 2020-ci ildə bütün dünya, o cümlədən Azərbaycan pandemiya şəraitində yaşayıb. Pandemiya makroiqtisadi göstəricilərin aşağı düşməsinə səbəb olub. Bütün bunlara baxmayaraq, ölkəmiz bu vəziyyətdən az itkilərlə çıxıb. Belə bir çətin ildə qeyri-neft sənayesinin 11 % artması dövlət tərəfindən aparılan düşünülmüş siyasətin nəticəsində mümkün olub. Ölkəmizin valyuta ehtiyatları qorunub saxlanılıb, hətta artırılıb. Ötən il ölkəmizin əsas uğurlarından biri olan Cənub Qaz dəhlizinin istismara verilib".

Sədr əlavə edib ki, Nazirlər Kabinetinin illik hesabatlarının Milli Məclisdə dinlənilməsi parlamentlə hökumət üzvləri arasında təmasların artmasına şərait yaradır: "Ötən il parlamentdə səsləndirilən təkliflər hökumət üzvləri tərəfindən araşdırılıb, bizə bununla bağlı geniş məlumat verilib: "Bu gün deputatlar aparacağımız müzakirələrdə fəal olacaq və səmərəli təkliflər irəli sürəcəkıər".

Artıq Milli Məclisin Nazirlər Kabinetinin 2020-ci ildə fəaliyyəti haqqında hesabatı müzakirəyə çıxarılıb. Hökumətin hesabatını Baş nazir Əli Əsədov təqdim edir. Hesabat təqdim edildikdən sonra müzakirələr olacaq.