Azərbaycanın iştirakı olmadan regionda hansısa layihənin həyata keçirilməsi mümkünsüzdür

İlham Əliyevin qətiyyəti sayəsində işğala son qoyulması ölkəmizin bölgədə rolunu daha da artırıb

Azərbaycan Prezidenti cənab İlham Əliyev fevralın 26-da yerli və xarici media nümayəndələri üçün keçirdiyi mətbuat konfransında jurnalistlərin suallarına geniş və əhatəli cavabları ilə regiondakı prosesləri, Azərbaycanın gələcəyə baxışlarını şərh etdi. Bütövlükdə, bu mətbuat konfransı ilə dövlətimizin başçısı dünya rekordu qırdı. Həmin mətbuat konfransı və cənab Prezidentin fikirləri dünya mediasında hələ də müzakirə mövzusudur. Milli Məclisin deputatı Ramil Həsən deyib ki, dünya mediasında Azərbaycan Prezidentinin Xocalı soyqırımı, işğaldan azad olunan ərazilərin minalardan təmizlənməsi, orada infrastrukturun yaradılması, məcburi köçkünlərin doğma yurdlarına qaytarılması ilə bağlı fikirlərinə geniş yer verilib: "Dövlətimizin başçısı azad edilən ərazilərin bərpası prosesindən danışarkən, bu məsələdə dost ölkələrin fəaliyyətinə daha çox diqqət yetiriləcəyini xüsusi vurğulayıb. Azərbaycan Prezidenti bu zaman qardaş Türkiyənin ölkəmizə münasibəti barədə xüsusi danışıb, bu ölkənin müharibənin ilk günlərindən haqq işimizə böyük dəstək verdiyini, sonrakı vaxtlarda isə bölgəmizin sabitliyini qorumaq üçün önəmli rol oynayan Rusiya-Türkiyə Monitorinq Mərkəzində səmərəli fəaliyyət göstərdiyini xatırladıb. Bütün bunlardan sonra təbii ki, qardaş ölkə Qarabağın bərpasında da köməyini əsirgəməyəcək. İlk müqavilələrin Türkiyə şirkətləri ilə imzalanması da bunun bariz ifadəsidir". Deputat qeyd edib ki, Azərbaycan Prezidenti işğal altında olan torpaqlarımızın azad edilməsindən sonra regionda uzunmüddətli sülh və əməkdaşlıq üçün geniş imkanların açıldığını diqqətə çatdırıb: "Azərbaycan Prezidenti perspektivlərdən bəhs etdiyi halda, Ermənistan tərəfinin bunun əksinə yönələn pozucu, aqressiv yanaşması rəsmi Yerevanın mənfur niyyətini açıq şəkildə nümayiş etdirir. Əgər Ermənistan rəsmiləri ordularının müasirləşdirilməsi yolu ilə revanşizm mövqeyindən çıxış edirsə, artıq bu, o deməkdir ki, 44 günlük İkinci Qarabağ müharibəsinin dərslərindən nəticə çıxarmaq istəmirlər. Eyni zamanda, hazırda bu ölkənin  yaşadığı siyasi böhran göz önündədir. Azərbaycanın illərdir Ermənistanı işğalçılıq siyasəti ucbatından bütün qlobal enerji layihələrindən təcrid vəziyyətə salması düşmən ölkənin iqtisadi böhran içərisində çapalaması ilə müşayiət olunur. Ermənistanın revanşist cəhdləri bir daha bu dövlətin təcavüzdən, düşmənçilikdən, nifaqdan uzaq olmaq istəmədiyini təsdiqləyir. Dünya birliyi bu kimi cəhdləri reaksiya verməlidir. Ermənistan yenidən bu yolu tutarsa, ən acınacaqlı vəziyyəti yaşayacaq. Ermənistanın hansı addımları atmasına və ona havadarlıq edən dövlətlərin dəstəyinə baxmayaraq, Azərbaycanın hər zaman beynəlxalq səviyyədə tanınmış sərhədləri çərçivəsində suverenliyini və ərazi bütövlüyünü təmin etməyə hazırdır və meydana çıxa biləcək hər hansı təhdidlərin qarşısını qətiyyətlə almağa qadirdir".

Millət vəkili Malik Həsənov qeyd edib ki, dövlətimizin başçısı İlham Əliyev Xocalı soyqırımının 29-cu ildönümündə  yerli və xarici media nümayəndələri üçün mətbuat konfransı keçirərək işğalçı Ermənistanın 30 ilə yaxın dövrdə havadarlarına arxalanaraq işğalçılıq siyasətini davam etdirdiyini, sonda rəzil duruma düşdüyünü, Azərbaycanın 44 günlük Vətən müharibəsində hərbi-siyasi Qələbəsinin regionda və dünyada yeni reallıqlar yaratdığını, dövlətimizin uğurlu siyasəti nəticəsində regional əməkdaşlığa böyük töhfələr verdiyini əsaslı şəkildə beynəlxalq auditoriyaya çatdırmaqla yanaşı, işğalçı dövlətə və dünyaya  mesajlarını da ünvanladı: "Möhtərəm Prezidentimiz 4 saatdan artıq davam edən mətbuat konfransında  dünyanın 35-dən çox media orqanının 50-yə yaxın sualını dəqiqliklə, məntiqlə, faktlar əsasında  cavablandıraraq müqayisəli təhlil əsasında bu məqamı xüsusi qeyd etdi ki,  əvvəllər  mənzərə tam fərqli idi. Uzun illər lazım oldu ki, biz dünyanın fikrini dəyişdirə, həqiqətləri təqdim edək".  M.Həsənov qeyd edib ki, Prezident İlham Əliyevin xarici media nümayəndələrinin suallarına, hətta spekulyativ xarakterli suallara belə təmkinlə, nəzakətlə, ətraflı, məntiqli və dəqiq cavablar verməsi, Azərbaycana qarşı dezinformasiya yaymaq istəyənləri yerindəcə tərkisilah etməsi belə bir həqiqətin nümayişidir ki, real faktlara,  tarixi həqiqətlərə əsaslanan təbliğat hər zaman qalib, eyni zamanda, dövlətinin, xalqının bugününü və gələcəyini düşünən Liderin özünəinamı, güvəni böyük olur: "İstər ölkə, istərsə də dünya ictimaiyyəti cənab İlham Əliyevin 44 günlük İkinci Qarabağ müharibəsində 30-a yaxın xarici KİV-lərə müsahibələrini unutmayıb. Hər bir müsahibə Azərbaycanın informasiya müharibəsində qələbəsinin təminatı idi. Bu gün isə dövlətimizin başçısı qalib Azərbaycanın qalib Lideri kimi   postmüharibə dövrünün reallıqlarından danışır". Millət vəkili bildirib ki,  möhtərəm Prezidentimiz   Ermənistana,  eyni zamanda, bütün digər  ölkələrə mesajlarını ünvanladı - Onlar yeni  reallıqlarla  barışmalı, hesablaşmalıdırlar. Ermənistan üçün ən məqbul seçim 10 noyabr Bəyanatının müddəalarını icra etməkdir. Əks-təqdirdə, onlar üçün daha da böyük problemlər yarana bilər. Mətbuat  konfransı ölkəmizin beynəlxalq informasiya məkanındakı növbəti  qələbəsidir" söyləyən M.Həsənov vurğulayıb ki,  həqiqətlər dil açıb danışır, Ermənistanın bugünədək havadarları tərəfində gizlədilən əməllərinə işıq düşür: "44 günün yaratdığı reallıqlardan biri budur ki, əvvəlki illərdən fərqli olaraq Azərbaycan  bu gün artıq  haqlı olduğu halda haqsız duruma düşmür. 44 günlük Vətən müharibəsindən sonra Azərbaycana artan diqqət  göz önündədir.  Dövlətimizin başçısı İlham Əliyev  dünya mətbuatının da ölkəmizə münasibətinin  artıq dəyişdiyini vurğuladı. Reallıq budur ki, əvvəllər Azərbaycan həqiqətləri ilə bağlı susqunluq nümayiş etdirən xarici KİV-lər indi mövcud reallığı öz gözləri ilə görür və qiymət verirlər". Millət vəkili regional əməkdaşlıq, bölgədə sülhün, təhlükəsizliyin təminatı məsələləri ətrafında ünvanlanan suallara dövlətimizin baçşısının cavablarının  əhatəli olduğunu qeyd edərək  bildirib ki,  hər zaman olduğu kimi, bu gün də Azərbaycanın iştirakı olmadan regionda hansısa iqtisadi və siyasi layihənin həyata keçirilməsi mümkünsüz olmaqla yanaşı, dövlətimizin başçısının qətiyyəti sayəsində işğala son qoyulması  Azərbaycanın bölgədə rolunu daha da artırıb. Prezident İlham Əliyevin  "Nəyi, necə, nə vaxt etmək lazımdır, bunu mən bilirəm" fikirlərinin  həyata keçirilən  siyasətdə öz təsdiqini tapdığını bildirən M.Həsənov vurğulayıb  ki, dövlətimizin başçısı  soydaşlarımızın   dogma yurd-yuvalarına qayıdışı ilə bağlı planlarını açıqlayarkən də    "Bizim yarışacağımız əsas tərəf müqabili zamandır" söylədi: "Cənab İlham Əliyev  media nümayəndələri ilə görüşünün də zamanının məhz indi olduğunu açıqlayaraq  "Hər bir işin öz vaxtı var" vurğuladı.  Məhz 44 günlük Vətən müharibəsində Azərbaycan Ordusu  30 ilə yaxın dövrdə dünyanın aparıcı dövlətlərinin, nüfuzlu beynəlxalq təşkilatların 30 ildə edə bilmədiklərini etdi, BMT Təhlükəsizlik Şurasının qətnamələri icra edildi. Göründüyü kimi, zaman hər bir hadisənin düzgün istiqamətləndirilməsində və dəyərləndirilməsində zəngin mənbə, hakim rolunu oynayır. Dövlətimizin başçısı mətbuat konfransında bugünümüz və gələcəyimiz  üçün bir çox  mesajlarını  verdi. Ölkə və dünya ictimaiyyəti  Prezident İlham Əliyevin nə qədər uzaqgörən, müdrik bir siyasi xadim olduğunu bir daha görərək  Azərbaycanın gələcəyinin daha möhtəşəm olacağını bildirirlər. Cənab İlham Əliyev mətbuat konfransında  bu reallığı da dünyaya bəyan etdi ki, İkinci Qarabağ müharibəsinin əhəmiyyəti təkcə ərazilərimizin, ərazi bütövlüyümüzün bərpası ilə məhdudlaşmır. Bütün dünya erməni faşizminin əsl real sifətini gördü".

Alim