İrəvanın Avropa uğursuzluğu

Azərbaycan işğalçı Ermənistan üzərində bütün parametrlər üzrə üstünlük əldə edir. İstər iqtisadi, istər siyasi, istər hərbi, istərsə də diplomatik sahədə Bakının İrəvandan fərqli olaraq hər ötən gün əldə etdiyi nailiyyətlər, uğurlar İrəvanı tədricən küncə sıxır, onu dərin böhran vəziyyətinə salır. Bütün bunlara rəğmən işğalçı ölkə rəhbərliyi hələ də Azərbaycana qarşı təxribatlara əl atır, öz aləmində beynəlxalq platforma və görüşlərdə rəsmi Bakıya diplomatik zərbə vurmağa çalışır. Ancaq hər dəfə də Azərbaycan rəhbərliyinin adekvat cavabı və əks zərbəsi ilə məğlub duruma düşür. Necə ki, bir neçə gün əvvəl Avropa İttifaqına üzv dövlətlərin və Şərq Tərəfdaşlığı ölkələrinin dövlət və hökumət başçılarının videokonfrans formatında keçirilən sammitində anoloji vəziyyət yarandı. Burada bir məqamı qeyd etmək yerinə düşər ki, Ermənistan rəhbərliyi artıq neçə dəfədir ki, Avropada ciddi diplomatik uğursuzluqlarla qarşılaşır və hətta erməni cəmiyyətində haqlı olaraq ötən müddətdə baş verənləri İrəvanın Avropa uğursuzluqları deyə xarakterizə edirlər.

Sözügedən formatda keçirilən videokonfrans və erməni rəhbərliyinin növbəti diplomatik uğursuzluğuna diqqət çəkən Milli Məclisin deputatı Pərvin Kərimzadə deyib ki, Azərbaycan işğalçı Ermənistana diplomatiya müstəvisində böyük zərbələr vurmaqda, bu ölkənin siyasi iflasını uğurla həyata keçirməkdədir. Onun sözlərinə görə, Prezident İlham Əliyevin "Valday" Beynəlxalq Diskussiya Klubu kimi motəbər bir forumun tribunasından "Qarabağ Azərbaycandır və nida işarəsi!" bəyanatı, Aşqabadda MDB Dövlət Başçıları Şurasının məhdud tərkibdə iclasında tutarlı faktlara əsaslanan nitqi, Münxen debatı zamanı səsləndirdiyi tutarlı cavabları hər bir Azərbaycan vətəndaşını qürurlandırır: "Eyni zamanda, dövlət başçımızın əzəli torpağımız Dağlıq Qarabağla bağlı Ermənistan hakimiyyəti tərəfindən səsləndirilən sərsəm iddialara sərt və tutarlı cavabları dünya içtimaiyyətində Ermənistanın işğalçı siyasəti haqqında aydın fikir yaradıb".

Pərvin Kərimzadə bildirib ki, Ermənistan növbəti belə diplomatik zərbəni iyunun 18-də Avropa İttifaqına üzv dövlətlərin və Şərq Tərəfdaşlığı ölkələrinin dövlət və hökumət başçılarının videokonfrans formatında keçirilən sammitində aldı. Videokonfransda Ermənistanın işğalçılıq siyasəti növbəti dəfə ifşa edildi: "Avropa İttifaqı Şurasının prezidenti Şarl Mişelin sədrliyi, Avropa Komissiyasının prezidenti Ursula fon der Lyayen və Aİ-nin xarici işlər və təhlükəsizlik siyasəti üzrə ali nümayəndəsi Cozef Borellin iştirakı ilə videokonfrans formatında keçirilən Sammitdə Prezident İlham Əliyev tərəfindən Dağlıq Qarabağla bağlı tarixi həqiqətləri tədbir iştirakçılarının diqqətinə çatdırıldı: "Ermənistan Azərbaycanın beynəlxalq səviyyədə tanınmış ərazisinin 20 faizinin işğalını davam etdirir. Dağlıq Qarabağ və Azərbaycanın daha 7 rayonu 30 ilə yaxındır ki, Ermənistanın işğalı altındadır. Ermənistanın etnik təmizləmə siyasəti nəticəsində 1 milyondan artıq azərbaycanlı qaçqın və məcburi köçkünə çevrilmişdir. BMT Təhlükəsizlik Şurasının 4 qətnaməsi Ermənistan qoşunlarının Azərbaycanın işğal edilmiş bütün ərazilərindən qeyd-şərtsiz və tam çıxarılmasını tələb edir. Ermənistan bu qətnamələrə, habelə ATƏT, Qoşulmama Hərəkatı, NATO, Avropa Parlamenti və digər beynəlxalq təşkilatlar tərəfindən qəbul edilmiş müvafiq sənədlərə əməl etmək əvəzinə işğal olunmuş ərazilərdə qeyri-qanuni məskunlaşma siyasəti həyata keçirir. Danışıqların mahiyyət və formatını məhv etməyə çalışan Ermənistanın baş nazirinin dediyinin əksi olaraq, Dağlıq Qarabağ Ermənistan deyil, Dağlıq Qarabağ Azərbaycandır və bütün dünya bunu belə tanıyır. Azərbaycanın ərazi bütövlüyü bərpa olunmalıdır". Azərbaycan Prezidentinin Qarabağla bağlı qətiyyətli mövqeyi Nikol Paşinyana, bütünlükdə erməni ictimaiyyətinə, həmçinin bu işğalçıların havadarlarına olduqca layiqli bir cavab oldu". Deputat qeyd edib ki, videokonfransda terrora dövlət səviyyəsində dəstək verən Paşinyan yenə də sərsəm ritorikaları və diplomatiya tarixinə ləkə gətirən qeyri-ciddi çıxışı ilə diqqəti cəlb etdi: "Erməni terroru ilə bağlı daha bir ifşaedici faktın Prezidentimiz İlham Əliyev tərəfindən yenidən diqqət mərkəzinə gətirilməsi Paşinyanın yalan üzərində qurulmuş çıxışını dəqiq faktlara və arqumentə əsaslanan məntiqli fikirləri ilə alt-üst etdi. Əvvəlku beynəlxalq toplantılarda olduğu kimi, növbəti dəfə də Azərbaycan Prezidenti işğalçı rejimin rəhbərinin yalanı ifşa etdi. Şərq Tərəfdaşlığı ölkələrinin videokonfrans formatında keçirilən Sammiti diplomatiya müstəvisində Ermənistanın baş nazirinin sərsəm iddialarının əsassız olduğunun daha bir nümayişi oldu".

Füzuli

Olaylar.az