İran XİN-dən Şuşada məscid təmir etmək xəbərlərinə münasibət

"İran şirkətinin Şuşada məscid təmir etməsinə dair yayılan xəbərləri təsdiqləmirik". Bunu İran Xarici İşlər Nazirliyinin sözçüsü  Bəhram Qasimi deyib. 

"İran şirkətinin Şuşada məscid təmir etməsinə dair yayılan xəbərləri təsdiqləmirik". Bunu İran Xarici İşlər Nazirliyinin sözçüsü  Bəhram Qasimi deyib. 
 
"Bizdə iranlı mühəndislərin Qarabağda olmasına dair məlumat yoxdur, biz bunu təsdiq etmirik", - deyə o bildirib.
 
B. Qasimi deyib ki, Qafqaz bölgəsində etnik və regional gərginliklər olduğu üçün bəzi KİV mənbəyi məlum olmayan, yalan, əsassız məlumatlar yayır, İran haqqında da bəzən belə məlumatlar yayılır.
 
"İranın Azərbaycan Respublikası, Qarabağ böhranı, eləcə də Ermənistana dair siyasəti  dəyişməyib. Bizim mövqeyimiz sabitdir və bu mövqeni davam etdirəcəyik", - deyə o qeyd edib.
 
İsrailin baş naziri Benyamin Netanyahunun Azərbaycana səfərinə də münasibət bildirən B. Qasimi deyib ki, Azərbaycan müstəqil ölkədir və bu, Azərbaycanın daxili məsələsidir: "Ancaq düşünürəm ki, Azərbaycan bu səfəri qəbul etməməli idi. Biz İsrailin dağıdıcı hərəkətlərini və fitnəkar davranışını müşahidə edirik. Onlar islam ölkələri arasında münasibətlərdə problemlər yaratmaq niyyətindədirlər".
 
Xatırladaq ki, iranlı mütəxəssislərin Şuşa məscidində bərpa işləri aparması barədə Ermənistan mətbuatı məlumat yayıb. Ermənistanın "news.am" saytının xəbərinə görə, İran şirkəti Dağlıq Qarabağdakı qondarma rejimin "İqtisadiyyat Nazirliyi"nin sifarişi ilə Şuşa məscidində bərpa işlərinə başlayıb. Bu il dekabrın 7-də tərəflər arasında müvafiq sənəd imzalanıb.