“Vətən müharibəsinin tarixi-siyasi dərsləri” adlı kitab çapdan çıxdı

Millət vəkili Aydın Mirzəzadənin müəllifi olduğu " Vətən müharibəsinin tarixi-siyasi dərsləri" adlı kitab çapdan çıxıb. "Olaylar" xəbər verir ki, kitab  Vətən müharibəsində Azərbaycan xalqının tarixi qələbəsinin araşdırılmasına və sonrakı dövrün analizinə həsr edilmişdir. Kitab ali məktəblərin humanitar fakültələrinin bakalavr və magistr pilləsinin tələbələri üçün dərslik tələbləri səviyyəsində hazırlanıb. Artıq bir neçə universitet bu xüsusi fənni özünün gələn ilki tədris ili planına daxil edib və bu dərslikdən istifadə edəcəkdir.

Kitab-dərslikdə  Azərbaycan Respublikasının Qarabağ bölgəsinin tarixi, süni Dağlıq Qarabağ Muxtar Vilayətinin yaradılması və onun Azərbaycan dövlətinin hesabına inkişafı, erməni millətçilərinin tarixi Azərbaycan torpaqlarına əsassız iddiası, SSRİ rəhbərliyinin onlara siyasi dəstəyi, Birinci Qarabağ müharibəsinin tarixi, beynəlxalq təşkilatların Ermənistan - Azərbaycan Dağlıq Qarabağ probleminə münasibəti, problemin həlli üçün Ulu öndər Heydər Əliyevin və Prezident İlham Əliyevin çoxşaxəli fəaliyyəti faktlarla analiz edilmişdir.

Eyni zamanda Vətən müharibəsinin gedişi və tarixi Zəfər, postmünaqişə dövrünün xarakteristikası, Azərbaycanın hərbi uğurunun, Ermənistanın isə kapitulyasiyasının səbəbləri də dərsliyin əsas istiqamətlərindəndir. Həmçinin Böyük Zəfərin əldə edilməsində qardaş Türkiyənin dəstəyinə də yüksək siyasi qiymət verilmiş, torpaqların azad edilməsinin dünya proseslərinə və Azərbaycanın qanuni milli maraqlarının təmin edilməsində əhəmiyyəti araşdırılmışdır. Kitab mövzu ilə maraqlananlar üçün də maraq doğuracaq. Kitabıb birinci nəşri Qərbi Kaspi Universiteti tərəfindən maliyyələşib. İkinci nəşri azad satışda olacaqdır. Kitab 282 səhifədir, birinci nəşri 200,  ikinici nəşri 400 nüsxədir.