Bakıda “Ardıc irsi muzeyi” fəaliyyət göstərir- FOTOLAR

Bakı şəhəri, Binəqədi rayonunda yerləşən 99 saylı tam orta məktəbdə tarix  müəllimi  işləyən Səyyad Rəfiyev zəngin  eksponatlardan ibarət tarix diyarşünaslıq muzeyi  təşkil edib. Muzey 30 ildən çoxdur ki, məktəb nəzdində fəaliyyət göstərir və əyani vəsait olaraq tədrisdə, şagirdlərin əyani biliklərinin artırılmasında  istifadə olunur.
Səyyad müəllim hələ vaxtilə işlədiyi  Ermənistanın Quqark rayonunun  Ardıc (ermənicə adı - Arçut) kəndinin orta məktəbində  zəngin muzey yaratmış və kəndin, həmçinin  ümumilikdə regionun zəngin irsini təbliğ etmişdir. 1988-ci ildə kənd əhalisi  zorla deportasiya olunanda və Azərbaycana pənah gətirəndə Səyyad müəllim zəlzələdə dağınıtlar altında qalmış eksponatların böyük bir qismini xilas edərək,  özü ilə Bakıya gətirmiş və işlədiyi məktəbdəki sinif otaqlarının birində  muzey kimi təşkil etmişdir. Hal-hazıra qədər muzey öz fəaliyyətini davam etdirməkdədir.  
Muzey eksponatları: daşişləmə, dulusçuluq, misgərlik, dəmirçilik, zərgərlik, xalçaçılıq elementlərindən  ibarətdir. Muzeydə həmçinin   müxtəlif dövrlərə aid olan pul nişanələri, bu baxımdan sikkələr, istiqrazlar nümayiş olunur. Maarifləndirmə məqsədilə muzeydə müxtəlif milli-mədəni tədbirlər həyata keçirilir. Çoxlu sayda qonaqlar  muzeyi ziyarət edirlər.  
Azərbaycanda və xarici ölkələrdə  məskunlaşmış Ardıc (Arçut) sakinləri  həmin muzeyi Qərbi Azərbaycanda erməni tapdağında qalmış kəndlərinin  maddi-mədəni irsi hesab edir və hal-hazırda  muzeyə özlərinin tarixi mədəni və ictimai sərvəti kimi sahib çıxmaq üçün mühüm işlər həyata keçirməkdədirlər. Bu yöndə kənd sakinlərinin başlıca və ümdə  məqsədi muzeyin  Səyyad Rəfiyevin təsisçiliyi ilə, qanunvericilikdə nəzərdə tutulmuş qaydada,  xüsusi mülkiyyət kimi dövlət qeydiyyatına alınmasına nail olmaqdan ibarətdir. Ölkə başçısı möhtərəm İlham Əliyevə və müvafiq qurumlara kollektiv müraciət edilməsi nəzərdə tutulur. Kənd sakinləri hesab edir ki, ermənilərin yalanlarını ifşa etmək üçün muzey ən mühüm maddi və mənəvi təbliğat və təşviqat vasitəsidir,  düşmənə  tutarlı cavab vermək üçün əldə olan ən mühüm silahdır. 
Bu barədə "ARDIC" Hərəkatının təsisçisi, əslən Ardıc kəndindən olan, siyasətşünas-alim, yazıçı, publisist Elşən Nəsibov məlumat verib.