Tarixi abidə ərazisində tikinti işləri dayandırıldı

Xəbər verildiyi kimi 10 may 2020-ci il tarixində AMEA Arxeologiya və Etnoqrafiya İnstitutuna Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Dövlət reyestrinin aparılması, abidələrə və tədqiqatlara nəzarət sektorunun müdiri Pərviz Nəcəfov tərəfindən Qobustan rayonu Sündü kəndi ərazisindəki yeni orta məktəbin tikinti işləri zamanı saxsı qab nümunələrinin aşkar edilməsi haqqında məlumat daxil olmuşdur.

AMEA Arxeologiya və Etnoqrafiya  İnstitutu rəhbərliyinin göstərişi ilə İnstitutun şöbə müdiri, bölgə üzrə arxeoloji ekspedisiyanın rəhbəri t.ü.f.d. Akif Quliyev rayona ezam edilmişdir və Mədəniyyət Nazirliyinin yanında Mədəni İrsin Qorunması, İnkişafı və Bərpası üzrə Dövlət Xidmətinin Qobustan rayon üzrə abidə mühafizəçisi Bəylər Musa oğlu Ağayevlə birgə maddi-mədəniyyət nümunələrinin aşkar edildiyi əraziyə baxış keçirilmişdir.

Əraziyə baxış keçirərkən müəyyən edilmişdir ki, ərazidə antik dövrə aid nekropol mövcud olub. Akif Quliyevin fikrincə, əraziyə yayılmış daşlara əsasən, Antik dövr nekropolu daş qutu qəbirlərdən ibarət olmuşdu və ümumilikdə, nekropol Qafqaz Albaniyasının xristianlıq ərəfəsindəki dövrə aiddir. Torpağın üst qatı ekskavator vasitəsi ilə götürüldüyündən nekropol dağıdılmış, mədəni təbəqə qarışmışdır. Təəssüflər olsun ki, abidənin aşkar edilməsi haqqında məlumat vaxtında müvafiq orqanlara çatdırılmamış və tikinti işləri zamanı abidənin çox hissəsi dağıdılmışdır.

Arxeoloq Akif Quliyevin məlumatına görə, tikinti rəhbərliyi Mədəniyyət Nazirliyi və AMEA Arxeologiya və Etnoqrafiya İnstitutunun rəhbərliyi ilə əlaqə saxlayaraq, ərazidə tədqiqat işlərinin aparılmasına qədər bütün tikinti işlərinin dayandırıldığını və bu işlərin arxeoloji araşdırmalardan sonra davam etdiriləcəyini bildirib.

A.Quliyevin sözlərinə görə əldə edilmiş razılığa əsasən yaxın vaxtlarda qeyd edilən ərazidə kəşfiyyat işləri başlanacaq, abidənin sərhədləri müəyyən ediləcək və Mədəniyyət Nazirliyi tətəfindən qeydiyyata alınacaq.

Abidədə arxeoloji tədqiqat işlərinin həyata keçirilməsi AMEA Arxeologiya və Etnoqrafiya İnstitutu və Mədəniyyət Nazirliyinin birgə qərarından sonra baş tuta bilər.

AMEA Arxeologiya və Etnoqrafiya İnstitutunun                                                              İctimaiyyətlə əlaqələr şöbəsi                                                                                                          Əlaqə:(012) 510 96 74, 055 659 04 95, 050 426 38 62                                          

SAYT: http://arxeologiya.az/

E-MAIL: [email protected]

FACEBOOK: Institute of Archaeology and Etnography of ANAS

Youtube:The Institute of Archaeology and Ethnography of the Azerbaijan National Academy of Sciences