Prezident xalq artistinin səhhətini şəxsi nəzarətinə götürdü

Kaman ustası Habil Əliyevin müalicəsi ölkədə davam etdiriləcək

Prezident İlham Əliyev və xanımı Mehriban Əliyeva Habil Əliyevin səhhətində baş verən prosesləri nəzarətə götürüb.  Anspress-in məlumatına görə bu haqda Mərkəzi Klinik Xəstəxananın həkim reanimatoloqu Səbinə Qasımova bu gun keçirilən mətbuat konfransında deyib. Həkim dövlət başçısının və xanımının hər gün mütəmadi olaraq xalq artistinin səhhəti ilə maraqlandığını bildirib.  Səbinə Qasımova Habil Əliyevin səhhəti ilə bağlı son məlumatları da açıqlayıb. Onun sözlərinə görə xalq artistinin səhhətində müsbətə doğru irəliləyiş var. Bu gün xəstəni müayinə edən Türkiyəli həkim Özkan Akıncı da müalicənin düzgün istiqamətdə aparıldığını deyib. Həkim bildirdi ki, xəstə artıq ətrafdakıları tanıyır, baş verən hadisələrə reaksiya verir, müəyyən hərəkətlər edə bilir.  "Xəstənin indiki vəziyyətinə yaşı və daha əvvələr keçirdiyi xəstəliklər də təsir edib. Buna görə də müalicə prosesi daha uzun çəkir". Həkimin sözlərinə görə xəstənin sağalması üçün bütün imkanlardan istifadə olunur. Hazırda onun xaricə aparılmasına heç bir ehtiyac yoxdur. Yerli və xarici həkimlərlə danışıqlar aparılıb və razılaşdırılıb. 

Hazirda Habil Əliyevin qidalanması süni aparat vasitəsilə aparılır. 

Ürək çatışmazlığından əziyyət çəkən xalq artisti Habil Əliyevin səhhəti bazar günü qəfil pisləşib. Vəziyyəti dəyişən kaman ustasi dərhal təcili tibbi yardim maşını ilə xəstəxanaya aparılıb. Vəziyəti ağır olduğundan musiqiçi müayinədən sonra reanimasiya şöbəsinə yerləşdirilib. 


Habil Əliyev - Xalq artisti
Foto: "El" jurnalının 99-cu buraxılışı

Habil Əliyev 28 may 1927-ci ildə Ağdaş rayonunun Üçqovaq kəndində anadan olub. Yeddi yaşında ikən rayon mərkəzindəki 3 saylı yeddiillik Ağdaş musiqi məktəbinə qəbul olub. 1952-ci ildə Bakıya gəlib Asəf Zeynallı adına orta ixtisas musiqi məktəbinin kamança şöbəsinə daxil olub. 1953-cü ildə Müslüm Maqomayev adına Azərbaycan Dövlət Filarmoniyasında əvvəlcə rəqs ansamblında müşayiətçi, sonra isə trioda kamança çalan kimi fəaliyyətə başlayır. 
Habil "Segah", "Bayatı-Qacar", "Bəstənigar", "Bayatı-Şiraz", "Rahab", "Bayatı-Kürd", "Cahargah", "Rast", "Zabul" muğamlarına yeni kamança həyatı verib.