Sığorta sektorunun iki aparıcı şirkəti əməkdaşlıq sazişi imzaladı

Azərbaycan sığorta sektorunun aparıcı şirkətləri olan "AtaSığorta" ASC və "Atəşgah" Sığorta Şirkəti ASC əməkdaşlıq sazişi imzalayıb. "OLAYLAR"-a daxil olan məlumata görə,  sazişin məqsədi şirkətlər arasında sağlam rəqabət mühitinin formalaşdırılması, ödəniş qabiliyyətinin artırılması, sığorta hadisələrinin tənzimlənməsində birgə fəaliyyət və müştəri məmnuniyyətinin təmin olunmasından ibarətdir.

Sazişin imzalanma mərasimində çıxış edən "AtaSığorta" ASC İdarə Heyətinin sədri Müseyib Əliyev qeyd edib ki, sığorta sektorunun qabaqcıl şirkətləri arasında əməkdaşlıq sazişinin bağlanması təqdirəlayiq haldır. Bu saziş şirkətlər arasında əməkdaşlığın güclənməsinə, həmçinin proseslərin sürətlənməsinə böyük fayda verəcəkdir. "Atəşgah" Sığorta Şirkəti İdarə Heyətinin sədri Azər Əliyev deyib ki, imzaladığımız saziş bütövlükdə sığorta bazarına müsbət təsirini göstərəcək. Çünki bu, sığortaçılar arasında qarşılıqlı anlaşma, müştərilərə təqdim edilən xidmət keyfiyyətinin yüksəldilməsi, sığorta mədəniyyətinin təbliği, sığorta vasitəçilərinin motivasiya sisteminin təkmilləşdirilməsi, eləcə də əhali üçün sərfəli və baha olmayan yeni sığorta məhsullarının tətbiqinə imkan yaradacaq.