"AzMeCo" və "Qazprom" Azərbaycana qaz tədarükü barədə müqavilə imzaladılar

Azərbaycanın "AzMeCo" şirkəti "Qazprom Eksport" MMC-dən 2 milyard kubmetrədək qazın alışına dair müqavilə imzalayıb. Bu barədə Trend MMC-yə istinadən məlumat verir. Müqaviləni Bakıda "Qazprom"un İdarə Heyətinin sədr müavini Aleksandr Medvedev və SOCAR-ın marketinq və investisiyalar üzrə vitse-prezidenti Elşad Nəsirovun iştirakı ilə "Qazprom Eksport" MMC-nin baş direktoru Yelena Burmistrova və "AzMeCo"nun Direktorlar Şurasının sədri Nizami Paşayev imzalayıblar. Məlumatda deyilir: "Bu, ildə 2 milyard kubmetrədək qazın alqı-satqısı barədə ortamüddətli müqavilədir. Təbii qazın tədarükü Qaradağ Metanol Zavodunun qaza olan tələbatını 100 faiz təmin edəcək. Qazın yaxın vaxtlarda tədarük edilməsi planlaşdırılır".