Abramyan: "Hökuməti məğlub etmək üçün onu gündəm diktəsindən məhrum etmək lazımdır" – ÖZƏL

Olaylar.az xəbər verir ki, Ermənistanın "Şərəfim var" fraksiyasının deputatı Tiqran Abramyan öz "Facebook" səhifəsində hakimiyyətin siyasi taktikasını kəskin tənqid edən paylaşım edib. Deputat bildirib ki, hökumət öz siyasi gündəmini qoruyub saxlamaq üçün hər yola əl atır.

Abramyanın sözlərinə görə, hakimiyyət nümayəndələri öz maraqlarını qorumaq naminə həm "sucuq və pirojki" yeyər, həm də lazım gəlsə, bir-birinin başına nahar töküb siyasi mənada "palçıq ata" bilərlər. O qeyd edib ki, cəmiyyətdəki rüsvayçılıq, istehza və bəzən də heyranlıq doğuran mənzərələrə rəğmən, hökumət öz gündəmini "dişləri ilə" qorumağa davam edir.

Müxalif deputat vurğulayıb ki, hökuməti məğlub etməyin yolu onu əsas kozırından, yəni gündəmə nəzarət etmək və atmosferi diktə etmək imkanından məhrum etməkdən keçir: "Hökuməti məğlub etmək üçün əvvəlcə onu gündəm üzərindəki nəzarətdən məhrum etmək, sonra isə alternativ təqdim etmək lazımdır. Yeri gəlmişkən, alternativin prinsipi keçmişin müxtəlif epizodlarını xatırlatmaq deyil, ictimaiyyət üçün yeni təklifin formalaşdırılması olmalıdır."

Abramyan əlavə edib ki, keçmiş dərslər dəyərlər sistemini qorumaq və yeni nəsli tərbiyə etmək üçün vacib olsa da, müasir siyasi reallıqlar yayına bilməyəcəyimiz fərqli tələblər irəli sürür.