Yepiskop Ovnan Akopyan: "Hakimiyyət kilsəyə qarşı yeni hücuma hazırlaşır" – ÖZƏL

Olaylar.az xəbər verir ki, Erməni Apostol Kilsəsinin Quqark yeparxiyasının rəhbəri, yepiskop Ovnan Akopyan NEWS.am müxbirinə müsahibəsində Ermənistan hakimiyyətinin kilsəyə qarşı ritorikasındakı son yumşalmanı şərh edib. Akopyan hesab edir ki, bu geriçəkilmə strateji yox, müvəqqəti xarakter daşıyır.

"Bu, sadəcə taktiki gedişdir"

Yepiskopun sözlərinə görə, hakimiyyətin kilsəyə qarşı təzyiqləri dayandırmış kimi görünməsinin əsas səbəbi yaxınlaşan seçkilərdir: "Ehtimal ki, seçkilərə hazırlaşırlar. Onların nüfuzu sıfıra enib, buna görə də müəyyən taktiki hiyləyə əl atırlar. Əks halda geri çəkilməzdilər."
 
Akopyan xəbərdarlıq edib ki, əgər hazırkı iqtidar parlament seçkilərində qalib gəlsə, kilsəyə qarşı daha kəskin kampaniya başladılacaq. Yepiskopun iddiasına görə, hakimiyyətin kilsəni zəiflətmək və ya tamamilə sıradan çıxarmaq planı var. Kilsə hakimiyyətin müəyyən proqramlarını həyata keçirməsinə maneə kimi görülür.

"Erməni kilsəsi sarsılmaz qalacaq," - deyə yepiskop fikrini tamamlayıb.